Qazaqstanda mindetti áleýmettik medısınalyq saqtandyrý (MÁMS) júıesin jetildirý baǵytynda mańyzdy zań qabyldandy. Bul zań halyqtyń áleýmettik turǵydan álsiz toptaryn, ásirese ál-aýqat deńgeıi daǵdarystyq jáne shuǵyl jaǵdaıda turǵan azamattardy medısınalyq kómekpen qamtýdy keńeıtýge baǵyttalǵan, dep habarlaıdy Egemen.kz.
2026 jyldan bastap MÁMS júıesine qosymsha 1 mıllıonǵa jýyq adam qamtylady. Bul — D jáne E sanatyndaǵy, ıaǵnı daǵdarysty jáne shuǵyl ál-aýqat deńgeıinde turǵan adamdar. Olar úshin MÁMS júıesindegi jarnalardy jergilikti bıýdjetter óz moınyna alady. Iаǵnı, bul azamattar medısınalyq kómekke óz tabysyna qaramastan, tegin jáne kedergisiz qol jetkize alady.
Bul ózgeris elimizdegi tabysy tómen halyqtyń shamamen 5%-ynyń josparly medısınalyq qyzmetterge qol jetkizý múmkindigin arttyrady. Sonymen qatar, jergilikti atqarýshy organdar osy toptaǵy azamattardyń medısınalyq kómekke júginý faktisi boıynsha jarna tóleýge mindetteledi.
Sonymen qatar, zańda resmı tirkelgen jumyssyzdar úshin de MÁMS jarnalaryn tóleý mindeti jergilikti bılikke júkteletini qarastyrylǵan. Bul qadam jumyssyzdyqpen kúres jáne halyqty jumyspen qamtý sharalarymen tikeleı baılanysty. JAO (jergilikti atqarýshy organdar) endi jumyspen qamtý saıasatyn iske asyrýmen qatar, sol azamattardyń densaýlyǵyn qorǵaýǵa da jaýapty bolady.
Qazirgi tańda elimizde 16,9 mıllıon adam nemese 82,6% halyq saqtandyrylǵan. Onyń ishinde 11,9 mıllıon azamat (ıaǵnı, 59,5%) jeńildetilgen sanattarǵa jatady, olardyń MÁMS jarnalaryn memleket ózi tóleıdi.
Sonymen birge, shamamen 3,4 mıllıon adam áli de MÁMS júıesine kirmegen. Onyń 2,4 mıllıony — ómir súrý deńgeıi qanaǵattanarlyq azamattar bolsa, 1 mıllıonǵa jýyǵy áleýmettik osal, daǵdarystyq jaǵdaıdaǵy azamattar. Osy sanattaǵy adamdar úshin endi MÁMS júıesine qosylý joly ashyq ári jeńil bolady.
Eńbekke qabiletti azamattar úshin de MÁMS júıesine qosylý sharttary jeńil: aıyna bar bolǵany 4 250 teńge, jylyna — 51 000 teńge. Bul soma tolyq medısınalyq qyzmetter paketin alý úshin jetkilikti.
2027 jyldan bastap Qazaqstan tolyqqandy saqtandyrý modeline ótýdi josparlap otyr. Bul model memlekettiń, jumys berýshilerdiń jáne azamattardyń ortaq jaýapkershiligine negizdelgen. Atalǵan sharalar «Halyq densaýlyǵy jáne densaýlyq saqtaý júıesi týraly» Kodekste kózdelgen ortaq jaýapkershilik qaǵıdattaryn iske asyrýǵa múmkindik beredi.