Densaýlyq saqtaý mınıstrligi el aýmaǵynda dárilik preparattardy tirkeý, dári-dármek aınalymyndaǵy rásimderdi ońtaılandyrýǵa kiristi. Kóp keshikpeı «bir tereze» qaǵıdaty boıynsha qyzmet usynyla bastaıdy. Buryn uzaq ýaqyt kútetin jumys barynsha jedeldeıdi.
Qoldanystaǵy erejeler sheńberinde dári-dármekti elimizde aınalymǵa jiberý rásimi shamamen 2 jyldan 5 jylǵa deıin sozylatyn. Osy olqylyqty retteý maqsatynda Densaýlyq saqtaý mınıstrligi Sıfrlyq damý, ınnovasııalar jáne aeroǵarysh ónerkásibi mınıstrligimen birlesip, kompozıttik qyzmetti úılestirýdi bastady. Kompozıttik qyzmet sheńberinde ishki tirkeý úderisterin ońtaılandyrýdy kózdeıtin norma iske asyrylmaq. Esesine, dárilik preparattardy tirkeý merzimi 100 kúnnen aspaıdy. Sondaı-aq Eýropalyq odaq, Japonııa, AQSh, Ulybrıtanııa elderinen jetken dári-dármekti jedel tirkeýge den qoıylyp otyr. Mundaı dárilik preparattardy tirkeý merzimin 15 jumys kúni ishinde júrgizý josparda bar. Dárilik zattarǵa baǵa belgileýdiń ashyq modelin qalyptastyrýǵa qatysty da birqatar másele ońynan sheshilgen. Bul jóninde Densaýlyq saqtaý vıse-mınıstri Erjan Nurlybaev málim etti.
«Baǵa modeli ózgerdi. Dárilik zattardyń shekti baǵasyna negizsiz qosylǵan ústeme baǵalar alynyp tastaldy. Elde tirkelgen barlyq dárilik preparat qaıta esepteledi. Qazir farmasevtıkalyq qoǵamdastyq atalǵan modeldi synaqtan ótkizýge qatysty jumys júrgizip jatyr. TMKKK, MÁMS sheńberinde dárilik preparattardyń quny shamamen 19%, kóterme-bólshek saýdada shamamen 30% tómendeıdi», dedi E.Nurlybaev.
Qańtardan bastap medısınalyq uıymdar elektrondyq qarjy ortalyǵynyń veb-portalynda dárilik zattar men medısınalyq buıymdardy onlaın rejimde satyp ala bastady. Qazirdiń ózinde 800-ge jýyq medısınalyq uıym osy alańdy belsendi paıdalanady. Veb-portal arqyly 120 mlrd teńgege jýyq shart jasalǵan. Qazir Densaýlyq saqtaý mınıstrligi elektrondy satyp alý formatyna kóshýdiń arqasynda qansha qarajat únemdelgenin anyqtap jatyr.
«Biryńǵaı dıstrıbıýtor arqyly dárilik zattardy satyp alý kezinde olardy saqtaý úshin de, tasymaldaý úshin de tólem jasaımyz. Densaýlyq saqtaý mınıstrligi «SK-Farmasııamen» birlesip, shyǵyndardy qysqartýǵa bolady degen qorytyndyǵa keldi. Biz saqtaý men tasymaldaýdy jeke qyzmetterge bólýdi usynamyz, óıtkeni olardyń árqaısysy arnaıy sharttardy, onyń ishinde temperatýralyq rejimdi saqtaýdy talap etedi», dedi vıse-mınıstr.
Sóıtip, dári-dármekterdi saqtaý, tasymaldaý qyzmetterin eki bólek lot retinde satyp alý týraly sheshim qabyldandy. Densaýlyq saqtaý mınıstrliginiń baǵalaýy boıynsha, bul shamamen 1 mlrd teńgeni únemdeýge múmkindik beredi.
Mınıstrlik Memleket basshysynyń tapsyrmasymen elimizdiń farmasevtıkalyq naryǵyndaǵy otandyq óndiris kólemin 50%-ǵa, odan joǵary deńgeıge jetkizý jónindegi jumysty júıeli júrgizip keledi. Jospardy 2029 jyldyń sońyna deıin oryndaý kózdelgen. Byltyr otandyq óndiris kólemi 15%-dy quraǵan. Salystyrmaly túrde nátıje kóńil kónshitedi dep aıtýǵa kelmeıdi. Sondyqtan mınıstrlik tapsyrmany oryndaý maqsatynda ınvestısııa tartý, qolaıly jaǵdaı jasaýmen aınalysatyn jobalyq keńse ashty. Qazir onda 7 joba qarastyrylyp jatyr. Investısııalardyń jalpy somasy shamamen 700 mln dollardy quraıdy. Olardyń barlyǵy dárilik preparattar óndirisin oqshaýlaýǵa baǵyttalǵan. Budan ózge, dári-dármekti tańbalaý jumystary úzilmeı jalǵasyp keledi. Bul el aýmaǵyna sapasy men shyǵarylǵan jeri kúmán týǵyzatyn ónimderdi kirgizbeý úshin qajet.