Bıylǵy jyldyń alǵashqy alty aıynyń qorytyndysy boıynsha elimizdiń kólik salasy 22,7%-ǵa ósti. Mundaı málimetterdi Úkimet otyrysynda kólik mınıstri Nurlan Saýranbaev keltirdi, dep habarlaıdy Egemen.kz.
Salanyń ósý dınamıkasyna júk tasymalynyń jalpy kóleminiń artýy áser etken, kórsetkish 550,7 mln tonnany qurap, ótken jylmen salystyrǵanda 10,9 %-ǵa joǵarylaǵan. Onyń ishinde avtomobıl kóligimen júk tasymaly 1,8 %-ǵa, temirjol kóligimen júk tasymaly 12,4 %-ǵa jáne qubyr arqyly tasymaldar 18,2 %-ǵa artqan. Jolaýshylar tasymaly 10,5%-ǵa ósip, 928 mln jolaýshyny quraǵan.
Júk tasymaly kóleminiń ósýi ekonomıkanyń bazalyq sektorynyń damýy esebinen qamtamasyz etildi, atap aıtqanda taý-ken metallýrgııasy, munaı-gaz, aýyl sharýashylyǵy, qurylys jáne saýda salalarynyń esebinen ósti.