Belarýs Respýblıkasynyń Vıtebsk qalasynda jyl saıyn ótetin «Slavıan bazary-2025» halyqaralyq baıqaýynda Jetisý oblysy Dánesh Raqyshev atyndaǵy fılarmonııanyń jeke daýystaǵy ánshisi Almagúl Battalıeva Gran-prı ıegeri atanyp, qazaq óneriniń bıiktigin taǵy bir dáleldedi. Halyqaralyq án báıgesindegi osy jeńisi jolynda segiz jyl boıy ulttyq irikteýlerge qatysyp, talmaı tájirıbe jınaqtaýdan jalyqpaǵan Almagúl el úmitin aqtady.
Belarýs eliniń kórermenderi men qazylar alqasyn ónerimen tánti etip, Qazaqstannyń abyroıyn asqaqtatyp kelgen talantty ánshini keshe Almaty áýejaıynan fılarmonııa ujymy men oblys ártisteri kók týdy jelbirete, án-jyrdan shashý shashyp, saltanatpen qarsy aldy. Almagúl Battalıeva – T.Júrgenov atyndaǵy ulttyq óner akademııasynyń túlegi, Jetisý oblystyq fılarmonııasynyń betkeustar ánshisi. Aımaqtyń mádenı sharalaryna belsendi atsalysyp, vokaldyq turǵydan kúrdeli halyq ánderimen birge, álemdik jáne reseılik hıt ánderdi de oryndap, qýatty daýysymen jáne harızmasymen kórermen yqylasyna bólengen jas talant.
«Baıqaý barysynda qatty qobaljydym. El namysyn qorǵaý – úlken jaýapkershilik ári úlken mártebe. Senimdi aqtadym dep oılaımyn. Sebebi elimizde talantty ánshiler kóp bolǵandyqtan, ulttyq irikteýden ótý ońaı bolǵan joq. Bul – qatań báseke, al báseke bar jerde, damý bar. «Slavıan bazarynda» Stevie Wonder-diń álemdik hıt áni men aqtyq synda «Vechnost» ánin oryndap, jeńis tuǵyrynan kórindim. Men bul jeńiske uzaq júrip jetkendeımin. Sebebi ándi bala kúnimnen aıtamyn. Meniń aldymda «kim bolamyn? Qandaı mamandyqqa qol artamyn?» degen suraq turǵan emes. О́ıtkeni kishkentaı kezimnen ánshi bolatynymdy bildim. Bıylǵy «Slavıan bazary-2025-te» týymyzdy jelbiretkenime qýanamyn», deıdi Almagúl Battalıeva.
Úsh kúnge sozylǵan halyqaralyq án dodasynyń jeńimpazdary: 1-oryn Belarýs eliniń ánshisi Valerııa Bernatovıchke tabystalyp, 2-oryndy Armenııa ánshisi Davıd Kırakosıan men Italııadan Domenıko Barbear bólisti. 3-oryndy reseılik Erık Ahmetov pen Qyrǵyzstannan kelgen Ryskeldi Starbekov ıelendi.
Álemniń kóptegen talantynyń baǵy men jolyn ashqan mártebeli baıqaýda óner kersketken Almagúl Battalıeva kásibı daralyǵy men tabandylyǵynyń arqasynda áli talaı álem sahnalary tórinen án shyrqap, ult abyroıyn asqaqtatatynyna senimdi.
ALMATY