Mádenıet – biriktirýshi kúsh

Keshe Premer-Mınıstrdiń orynbasary Berdibek Saparbaevtyń qatysýymen «Shabyt» shyǵarmashylyq saraıynda ótken Mádenıet jáne sport mınıstrliginiń keńeıtilgen alqa otyrysynda byltyrǵy jylǵy atqarylǵan jumystar qorytyndylanyp,  2015 jylǵa arnalǵan mindetter men salanyń aldaǵy kezeńdegi damý múmkindikteri tııanaqtaldy. Mádenıet pen sport salasynyń belgili ókilderi, salalyq komıtetter men vedomstvolyq uıym­dardyń basshylary qatysqan alqa otyrysynda Mádenıet jáne sport mınıstri Arystanbek  Mu­hamedıuly 2014 jylǵy ju­mys­tyń nátıjeleri týra­ly qysqasha baıandaı kelip, aldaǵy ýaqytta atqarylatyn  is-sha­ralardyń mańyzdylyǵyna toq­taldy. Mádenıet salasynyń  2014 jyldaǵy asa mańyzdy jobalarynyń biri Memleket basshysynyń Jarlyǵymen Mádenı saıasattyń uzaq merzimdi tujyrymdamasynyń bekitilýi boldy, dedi sala basshysy. Tu­­jyrymdama shyǵarmashyl adamdardyń ıgiligine baǵyttalǵan. Múddeli memlekettik organdarmen jáne óńirlermen tyǵyz baılanys­ty kózdeıtin Tujyrymdamany iske asyrýdyń birinshi kezeńi úshin is-sharalar jospary (2015-2019 j.j.) Úkimet qaýlysymen bekitildi. Birinshi kezeń Qazaqstan Res­pýblıkasy Prezıdenti janynan Ádebıet jáne óner jónindegi ulttyq keńes, sondaı-aq,  Má­denıet jáne sport mınıstrligi janynan salalar boıynsha kór­kemdik keńester qurý sııaqty ma­ńyzdy qadamdardy júzege asy­rýǵa arnalatynyn atap ótken  mınıstr, keleshekte bul ınstıtýttar sa­lalyq máseleler men resýrstardy biriktirýdi, repertýarlyq, gastroldik, kadrlyq saıasatty – óńiraralyq ózara is-qımyldy qosa otyryp,  eldiń mádenı saıasatyn iske asyrý jónindegi basty úılestirýshi ortalyqtarǵa aınalatynyn jetkizdi. «Respýblıkada 8 myń jer­gilikti jáne 39 respýblıkalyq mádenıet uıymdary bar. Bul aýqymdy ınfraqurylym sapany arttyrýdy jáne  elimiz boıynsha  halyqty qamtýdy keńeıtýdi qamtamasyz ete otyryp, úılesimdi damýda. 2014 jyldaǵy aýqymdy ın­fraqurylymdyq jobalardyń biri – Astana qalasynda Qazaq­stannyń Ulttyq mýzeıiniń ashylýy boldy. Jibek jolynyń Jetisý bóli­gindegi 8 qazaqstandyq nysannyń IýNESKO-nyń tizimine enýi eldiń tarıhı-mádenı murasynyń damýyna jańa serpin beredi. Qazirgi tańda Jibek jolynyń Syrdarııa bóliginiń eskertkishterine qu­jattama ázirlenýde» degen sala basshysy IýNESKO materıaldyq emes mádenı mura reprezentatıvti tizimine Qazaqstannyń «Dástúrli dombyra kúıin oryndaý óneri» atalymy jáne Qyrǵyzstanmen birlesken «Qazaq jáne qyrǵyz kıiz úılerin jasaýdyń dástúrli bilimderi men daǵdylary» atalymy ense, bolashaqta «Aıtys», Naýryz», «Búrkitpen ań aýlaý» jáne taǵy da basqa qundylyqtardy engizý josparlanyp otyrǵanyn tilge tıek etti. Endigi bir mańyzdy másele – birqatar beıindi oqý oryndarynyń Mádenıet jáne sport mınıstrligi qaraýyna berilýi óte oryndy. О́ıtkeni, oqý barysynda jas daryndar shyǵarmashylyq ortaǵa enýge, ózderiniń áleýetin ashý úshin joǵary yntalandyrýǵa qol jetkizýge, óner salasynyń jetekshi mamandarynyń qol­daýyna jáne tájirıbesine ıe bolýǵa múmkindik almaq. Jalpy, mádenıet salasynyń jalpy dınamıkasy turaqty damýdy kórsetedi. Bizge osy qarqyndy saqtap qalý mańyzdy, degen sala basshysy budan basqa sport, din isteri, tilderdi damytý, muraǵat isi, úkimettik emes uıymdarmen jumys týraly is nátıjelerin málimdedi. Keńeıtilgen alqa otyrysynda Ulttyq akademııalyq kitap­hananyń bas dırektory Úmithan Muńalbaeva, Shyǵys Qazaqstan oblystyq murajaı-qoryǵynyń dırektory Nıkolaı Zaısev,    bokstan Olımpıada chempıony Ermahan Ybyraıymov, Mádenıet jáne óner isteri departamentiniń dırektory Aqtoty Raıymqulova, Sport jáne deneshynyqtyrý komıteti tóraǵasynyń orynbasary Málik Sapashev, Din isteri komıtetiniń tóraǵasy Ǵalym Shoıkın, Tilderdi damytý jáne qoǵamdyq saıası jumys komıteti tóraǵasynyń qyzmetin atqarýshy Qýanysh Asylov, Bilim, ǵylymı jumys jáne halyqaralyq yn­tymaqtastyq departamentiniń dırektory Dinıslam Bolathanuly osy salalar boıynsha byltyrǵy atqarylǵan jumystarǵa toq­taldy. Alqa qorytyndysy boıynsha Qazaqstan Respýblıkasy Premer-Mınıstriniń orynbasary Berdibek Saparbaev Memleket basshysynyń «Nurly Jol – bolashaqqa bastar jol» Joldaýyn júzege asyrý barysyndaǵy naqty tapsyrmalardy shegeleı kelip,  2015 jylǵa arnalǵan basym mindetterge  nazar aýdartty. Ár memleket úshin mádenıet qashanda mańyzdy sala bolyp qala beretinin málimdegen Berdibek Máshbekuly ekonomıkalyq qıyn­dyqtarǵa qaramastan, Mem­leket bas­shy­synyń oǵan árdaıym úlken kóńil bólip otyratynyn aıtty. Mysaly, munyń dáleli – elordada qanshama mynadaı eńseli záýlim ǵımarattar bar, dedi.  Mádenıettiń oshaǵy – aýyl bolyp sanalatynyn eske salǵan  Úkimet basshysynyń orynbasary jer-jerdegi klýbtar men kitaphanalarǵa kóńil bólý kerektigin basa aıtty. Bizde kitap qorlaryn tıimdi paıdalanýdyń úzdik dástúrleri qalyptasyp keledi. Mysaly, Memleket basshysy Nursultan Nazarbaevtyń ózi bas bolyp kitaptary men belgili saıasatkerlerdiń syılyqtaryn Elbasy kitaphanasyna tapsyrǵan edi. Sol sııaqty Ulttyq akade­mııalyq kitaphanaǵa memle­ket jáne qoǵam qaıratkeri Myr­zataı Joldasbekov jeke kitap qoryn tartý etti. Al aýyldyq jerler­de mundaı qorlar óte kóp. Olardy kópshilik ıgiligine, jastarymyzdyń rýhanı muratyna aınaldyrý úshin jergilikti at­qarýshy organdarmen birlesip qyrýar is tyndyrý kezeńi týyp otyr. Budan bólek B.Saparbaev elimizdegi teatrlar reper­týa­rynyń jutańdyǵyn, «Táý­el­sizdik tolǵaýy» báıgesi je­ń­­impazdary shyǵarmalarynan ásirese, jergilikti jerlerdegi kórermenderdiń tys qalyp qoıyp jatatynyn, jylyna qyrýar qarjy bólinetin kı­no salasynyń áli de bolsa álemdik básekege ilese almaı kele jatqanyn, ba­lalarǵa ar­nalǵan anımasııalyq fılm­derdiń tapshylyǵyn til­ge tıek ete kelip, sóziniń so­ńynda mı­nıstrlik barlyq jumys­tar­dyń biriktirýshisi bola bilýi kerek. Sonda ǵana jaqsy nátıjege qol jetkizýge bolady, dedi. Qarashash TOQSANBAI, «Egemen Qazaqstan».