Álemniń birshama elinde adamnyń tabysy – jeke, qupııa aqparat. Bireýden «qansha tabasyń?» dep suraýdyń ózi ádepsizdik bolyp sanalady. Al keıbir memleketterde mundaı aqparatty múlde jarııa etýge tyıym salynǵan. Biraq álemde kez kelgen azamat basqa adamnyń tabysyn resmı túrde bile alatyn bir memleket bar. Bul – Shvesııa, dep jazady Egemen.kz.
Shvesııada qoǵamdyq ashyqtyq asa joǵary baǵalanady. Bul elde turǵyndar men memleket arasyndaǵy senim myqty. Sol senimniń arqasynda qoǵamda barlyǵy bir-birine jaýap beredi. Ásirese memlekettik qyzmetkerler men laýazymdy tulǵalar tabysy men ómir salty boıynsha baqylaýǵa ashyq.
Shvesııada árbir azamat salyq qyzmetine baryp nemese onlaın túrde basqa adamnyń salyq deklarasııasyn suraýǵa quqyly. Iаǵnı, siz basqa adamnyń jyldyq tabysyn, tólengen salyǵynyń mólsherin, keıde tipti múlki týraly aqparatty da bile alasyz. Bul júıe «qupııany buzý» nemese bireýge zııan keltirý úshin emes, qoǵamdaǵy ádilettilikti saqtaý maqsatynda engizilgen.
Shvesııada bul úderis jasyryn túrde júrgizilmeıdi. Eger siz bireýdiń tabysy týraly málimet suratsańyz, sol adamǵa arnaıy habarlama jiberiledi. Habarlamada sizdiń atyńyz ben qaı kúni suratqanyńyz jazylady. Bul – bireýdiń jeke ómirine ruqsatsyz aralasýǵa jol bermeýdiń tetigi. Iаǵnı, suraýǵa bolady, biraq jaýapkershilikpen ǵana.
Bul júıeniń maqsaty ne? Shvesııa bul ashyqtyqty qyzǵanysh týdyrý úshin emes, áleýmettik ádilettilik pen senimdi nyǵaıtý úshin qoldanyp otyr. Maqsat – ár azamattyń tabysy men qyzmettik laýazymy sáıkes kele me, joq pa sony baqylaýǵa múmkindik berý. Mysaly, memlekettik qyzmetker ortasha jalaqy alsa da, birneshe qymbat úıi men kóligi bolsa, bul zańsyz tabys nemese jemqorlyq kúdigin týǵyzýy múmkin. Mundaı jaǵdaılardan qoǵam ashyq baqylaý arqyly qorǵana alady.
Árıne, ár eldiń mádenıeti men zań júıesi túrlishe. Biraq Shvesııa úlgisi basqa elderge de oı salarlyq tájirıbe.