Ulytaý oblysynyń tarıhı-arheologııalyq mýzeıi qorynda qasqyr terisinen tigilgen ishik bar. Mýzeı basshysy Zaǵıra Kalmenova: «О́tken jyly Astana qalasynda V Dúnıejúzilik kóshpeliler oıyndary aıasynda ótken kórmeni shetelden kelgen qonaqtar tamashalady. Sonda meımandar 90 jastaǵy Orynbasar Myrzabaeva ájeniń qolynan shyqqan qasqyr ishikke qyzyǵýshylyq tanytyp, sapasyna joǵary baǵa berdi. Bul – ájeıdiń jaryna tikken ishigi», deıdi.
Osy ishikti tikken Orynbasar ájemen syrlasýdyń reti keldi. «Jasym toqsannan asty. Kúıeýim qasqyr aýlap, terisin ákep beretin edi. Er adam tabys tabady, úıdegi áıel uqsatýy kerek. Sodan jaryma osy qasqyr ishikti tigip berdim. О́kinishke qaraı, otbasymnyń tiregi 1972 jyly qaıtys boldy. Áli is tigemin. Qyzym keıde jany ashyp, is mashınamdy «buzyp» tastaıdy», dep ótken ómirinen qyzyq jaılardy tilge tıek etti keıýana .
Ol bala kezinde ájesiniń qolynda tárbıelenip, er bala sııaqty erkin ósedi. Tipti shashyn taqyrlap alyp, uldyń kıimin kıedi. Mektepte oqyp júrgende jasaǵan tentektigi úshin buryshqa turǵyzǵan muǵalimimen «ustasyp» qalady. Sodan muǵalimge eregisip sabaqqa barmaıdy. Úıdiń ishi de «Munyń qalaı?» dep urysa qoımaıdy. Muǵalim úıge kelip, áke-sheshesine «Balańyz sabaqqa kelmeı júr», dep eskertse de, bala Orynbasar «oqymaımyn» dep short kesedi. Sabaqqa barmaı qoıǵan soń, ákesi 16 jasqa kelgende qyzyn Jezdidegi tigin sehyna jumysqa ornalastyrady. Ol kezde sehta qazaq joq, kileń nemis ultynyń ókili jumys istepti. Tiginshi bolyp jumys istep júrgende ataqty geolog Qanysh Sátbaev «Rýda salatyn qalta kerek, jáshik joq», degen soń, dorba tigip beredi.
Jumysyn istep júrip, 18 jasynda turmysqa shyǵady. Joldasy dúkenshi eken. Jastardyń turǵan jerinde jumys bolmaǵan soń, Orynbasar «meniń ákem» dep atap ketken Qanysh Sátbaevqa jumys surap barady. Qanekeńniń qamqorlyǵymen kúıeýi Qýmola degen eldi mekenge dúkenshi ári sharýashylyq basshysy bolyp jumys isteıdi. Bir kúni «Qanysh Sátbaev Qýmolaǵa keleıin dep jatyr, soǵan tamaq pisirip beretin adam kerek» degendi estip, ózi suranyp, qonaq kútýdiń qamyna kirisedi. Qoı soıdyrady. Qasyndaǵy 5-6 geologimen Qanysh Sátbaevqa tabaq tartyp, qaımaq qosqan kúreń shaı beredi. Demalsyn dep aǵash úıge aparyp, qus tósegin salady. Erteńinde qazaqtyń qarynbúrme degen tamaǵyn istep, kútedi. Keterinde rıza bolǵan ǵulama ǵalym mańdaıynan súıip, aq batasyn beredi.
Tiginshilikten qol úzbeı, 1989 jyly zeınetkerlikke shyǵady. On bala tárbıelep ósiredi. Ájeıdiń ıne-jibi qolynan áli túsken joq. Jergilikti turǵyndar tapsyrys beredi.
Ulytaý oblysy