Astanada jastar men jasóspirimder arasynda aýyr atletıkadan ótken Azııa chempıonaty elimiz quramasynyń aıqyn jeńisimen aıaqtaldy. Jarysta 27 memleketten kelgen 450-den asa ziltemirshi kúsh synasty.
Barlyq jattyǵýdy esepke alar bolsaq, elimizdiń jastar quramasy 12 altyn, 4 kúmis, 7 qola medaldy oljalady. Vetnam men Úndistannyń nátıjeleri birdeı boldy. Olar 8 altyn, 6 kúmis, 2 qolany qorjynǵa saldy. Ońtústik Koreıa quramasy 7 altyn, 6 kúmis, 4 qolany enshiledi. Jasóspirimder jarysynda jerlesterimiz 9 altyn, 8 kúmis, 10 qolany qanjyǵaǵa baılady. Taıland 6 altyn, 7 kúmis, 2 qolany ıelendi. Qytaıdyń qorjynynda – 6 altyn, 5 kúmis, 1 qola. Azııanyń eń úzdik komandalary arasynan elimizdiń ziltemirshileriniń ozyp shyǵýy otandyq aýyr atletıkanyń áleýeti óte joǵary ekenin baıqatady.
Ásirese 71 kg salmaq dárejesinde óner kórsetken 17 jastaǵy Álıhan Áskerbaıdyń sheberligi barshany tánti etti. Jetisý oblysy, Sarqan aýdany, Qarabóget aýylynyń týmasy jarystyń úsh jattyǵýy boıynsha da aldyna jan salmaı, bas júldeni oljalady. Álıhan Azııanyń úsh, álemniń úsh rekordyn jańartty. Qossaıystyń qorytyndysynda asa daryndy jas óren 310 (141+169) kılogrammdyq ziltemirdi eńserdi. Bul – erekshe atap óterlik jaıt. Qazirde bilikti bapker Sergeı Sedovtyń qol astynda jattyǵyp júrgen Á.Áskerbaıdyń bolashaǵyna mamandar zor úmitpen qarap otyr. Sebebi byltyrǵy Azııa chempıonatynda da qandasymyz altyn tuǵyrǵa kóterilgen edi. Ol kezde Álıhan 64 kg salmaqta baq synady.
Astana tórinde Á.Áskerbaıdan bólek, Ksenııa Prozorova (58 kg), Nurjan Jumabaı (79 kg), Edige Emberdi (79 kg), Kıra Danılova (69 kg), Erasyl Sáýlebekov (88 kg), Denıs Polýboıarınov (94 kg), basqa da ziltemirshiler tamasha óner kórsetip, kópshiliktiń qoshemetine bólendi.