QR Mádenıet jáne aqparat mınıstri Aıda Balaeva «AIQYN» basylymyna bergen suhbatynda eldegi mádenı ınfraqurylym men kitaphana salasynda júrgizilip jatqan ózgerister týraly aıtty, dep habarlaıdy Egemen.kz.
Mınıstrdiń aıtýynsha, qazirgi zaman oqyrmany men tyńdarmany sıfrlyq keńistikte ómir súretindikten, mádenı mekemelerdiń de mazmuny osy úderisterge saı jańartylýy qajet.
«О́te oryndy suraq. Shyn máninde, mádenı ınfraqurylymdy jańǵyrtý – tek qabyrǵany jóndeý emes, eń aldymen onyń ishki mazmunyn jańartý. Qazirgi zamannyń oqyrmany, kórermeni, tyńdarmany múlde basqa. Olar jyldam aqparat alady, sıfrlyq keńistikte ómir súredi. Sondyqtan biz mádenı mekemelerdiń mazmunyn da sol úderisterge saı beıimdeýimiz kerek», dedi mınıstr.
Sonymen qatar Aıda Balaeva kitaphanalardy ıntellektýaldy ortalyqqa aınaldyrý jolynda birqatar naqty qadamdar jasalyp jatqanyn atap ótti.
«Kitaphanalarǵa kelsek, sońǵy jyldary bul salada birqatar ózgeris júzege asyrylyp jatyr. Jaı ǵana kitap saqtaý orny emes, ıntellektýaldy ortalyqqa aınalý jolynda naqty qadamdar jasalýda. Ásirese, Ulttyq akademııalyq kitaphana, Ulttyq kitaphana jáne óńirlik kitaphanalar sıfrlyq transformasııa úderisin bastap ketti. Elektrondy katalogtar, onlaın qyzmetter, sıfrlyq platformalar – búginde kitaphanalar qyzmetiniń ajyramas bóligine aınaldy», dedi ol.
Alaıda Aıda Balaeva qazirgi tańda kitaphana sórelerinde oqyrman suranysyn tolyq qanaǵattandyra alatyn zamanaýı janrlar men jańa týyndylardyń jetispeıtinin tilge tıek etti. Bul jaǵdaı qordy júıeli jańartýdy, ádebı úrdisterdi baqylaýdy qajet etedi.
«Qazir, ókinishke qaraı, oqyrman izdegen jańa týyndylar, zamanaýı janrlar, balama ádebıetter kitap sórelerinen tabyla bermeıdi. Bul – qordy jańartý, júıeli saraptaý, naryqtaǵy ádebı úrdisterdi baqylaý qajet degen sóz», dedi mınıstr.
Aıda Balaeva zamanaýı ádebıetpen kitap qoryn jańartý qolǵa alynǵanyn, bul tek kórkem ádebıetke emes, sonymen qatar ǵylymı-kópshilik, kásiptik, motıvasııalyq, balalar men jasóspirimderge arnalǵan kontentke de qatysty ekenin aıtty. Mınıstr balalar men jasóspirimder arasynda komıks, fentezı, detektıv, fantastıka sekildi janrlarǵa qyzyǵýshylyqtyń artqanyn jáne bul baǵyttaǵy kitaptardy kóbeıtý qajettigin aıtty.
«Qazirgi balalar men jasóspirimder komıks, fentezı, detektıv, fantastıka janrlaryna qyzyǵýshylyq tanytady. Bul – olardyń ádebıetke bastar alǵashqy joly. Sondyqtan osy baǵyttaǵy kitaptardy kóbirek shyǵaryp, qorlardy jańartý, zamanaýı avtorlardy qoldaý – kún tártibindegi mańyzdy mindet», dedi mınıstr.
Sondaı-aq mınıstr memleket tarapynan ádebıetke degen qoldaý artyp otyrǵanyn atap ótti. Jyl saıyn ótkiziletin ádebı baıqaýlar men zertteýler sonyń dáleli.
«Biz ótken jyldary egemen tarıhymyzda alǵash ret respýblıkamyzdaǵy búkil kitaphana qoryna tııanaqty taldaý júrgizdik. Nátıjesinde, túıgen túıinimiz – elde bar kitaptyń sany kóp, biraq salasy jutań. Aınaldyrǵan tórt-bes avtordyń bir taqyryptaǵy kitaptary birneshe márte ózgertilip, qaıta-qaıta basyla bergen», dedi Aıda Balaeva.
Aqparat mınıstri mysal retinde belgili klassık jazýshynyń 1 174 kitaby 26 804 danada bolsa, ortańqol avtordyń 1 012 kitaby 34 746 danamen taralǵanyn atap kórsetti.
«Qazirgi ádebıette qazirgi zaman adamynyń kórkem beınesi, Qazaqstannyń jańa myńjyldyqtaǵy kelbeti, jahandaný kezeńindegi ulttyq bolmys, ǵylym men tehnologııa taqyryptary áli de jetkilikti qamtylmaı otyr», dep túıindedi A.Ǵalymqyzy.
Aıta keteıik, El Prezıdenti «kitap oqıtyn ult» bastamasyn kóterip, qoǵamda kitap oqý mádenıetin qalyptastyrýǵa shaqyrǵan bolatyn. Osy oraıda, mádenıet mınıstrligi otandyq kitaphanalar men ádebıet salasyn jan-jaqty damytýǵa kúsh salyp keledi.