QR Mádenıet jáne aqparat mınıstri Aıda Balaeva «Aıqyn» basylymyna bergen suhbatynda elimizdegi kitap shyǵarý isiniń jaı-kúıi men kitap oqýǵa baýlý máselelerine toqtaldy, dep habarlaıdy Egemen.kz.
Aıda Balaeva qazirgi balalar men jasóspirimderdiń fentezı, detektıv, fantastıka jáne komıks sekildi janrlarǵa erekshe qyzyǵýshylyq tanytatynyn atap ótip, bul baǵyttaǵy ádebıetterdi kóbeıtip, kitaphanalar qoryn jańartýdyń jáne qazirgi avtorlardy qoldaýdyń mańyzdy ekenin aıtty.
«Balalarǵa kitapty kúshtep oqytý emes, qyzyqtyra otyryp úıretý qajet. Olar ádebıetke jańa formalar arqyly ǵashyq bolýy múmkin. Demek, biz ádebıet pen mádenıette murany saqtaı otyryp, bolashaqty qalyptastyrý mıssııasyn qatar alyp júrýimiz kerek», dedi mınıstr.
Sonymen qatar ol memleket tarapynan kitap shyǵarýǵa bólinetin qarjyny tıimdi paıdalaný, mazmundyq jańǵyrtý men jazýshylardy júıeli túrde qoldaýdyń mańyzdylyǵyn atap ótti. A.Balaevanyń sózinshe, bul tek birjolǵy is emes, strategııalyq turǵydan qaraýdy qajet etetin uzaq merzimdi jumys.
Mınıstrdiń aıtýynsha, Prezıdent Ákimshiliginiń tapsyrmasyna sáıkes, 2025 jyly jaryq kóretin kitaptar arasynda zamanaýı kórkem ádebıet, pýblısıstıkalyq (non-fiction), ǵylymı-kópshilik, balalar men jasóspirimder ádebıeti jáne aýdarma eńbekterdiń úlesi 80%-ǵa deıin ulǵaıǵan.
Sondaı-aq, Táýelsizdik jyldarynan beri memleket tapsyrysy aıasynda jazýshylardyń kitaptary turaqty túrde jaryq kórip, búkil respýblıkadaǵy kitaphanalarǵa taratylady. 2017–2024 jyldary aralyǵynda osyndaı tapsyryspen 1 487 kitap 4,9 mıllıon danamen basylyp shyqqan. Sonymen qatar qalamgerlerge qalamaqy tóleý júıesi de qalyptasqan.