AQSh Kongresiniń bıýdjettik basqarmasy prezıdent Donald Tramptyń jýyrda qabyldaǵan salyq jáne shyǵyndar jónindegi zań jobasy 2034 jylǵa deıin federaldyq bıýdjet tapshylyǵyn 3,4 trıllıon dollarǵa ulǵaıtady dep boljady, dep habarlaıdy Egemen.kz FOX4-ke silteme jasap.
Respýblıkashyldar bul qujat salyqtyq júktemeni azaıtady dep málimdeıdi. Olardyń aıtýynsha, zań jobasy AQSh-ta óndirilgen jańa kólikterge, ústeme jumys ýaqytyna, sondaı-aq avtonesıelerdiń paıyzdaryna salyq jeńildikterin qarastyrady. Alaıda, AP-NORC saýalnamasyna sáıkes, amerıkalyqtardyń basym bóligi — shamamen úshten ekisi — jańa zań baı azamattarǵa ǵana tıimdi bolady dep sanaıdy.
Sonymen birge, qujat Medicaid pen azyq-túlik kómegine bólinetin bolashaq shyǵyndardy azaıtýdy, sondaı-aq taza energııa boıynsha birqatar salyqtyq jeńildikterdi joıýdy kózdeıdi.
Kongrestiń esebinde zań jobasy arqyly únemdeletin 1 trıllıon dollardan astam qarjy negizinen densaýlyq saqtaý salasyndaǵy qysqartýlar esebinen júzege aspaq. Onyń ishinde, keıbir Medicaid benefısıarlaryna jumysqa ornalasý talaby engiziledi. Sarapshylardyń aıtýynsha, bul ózgerister saldarynan 2034 jylǵa deıin 10 mıllıonnan astam adam medısınalyq saqtandyrýsyz qalýy múmkin.
Esterińizge sala keteıik, AQSh-tyń memlekettik qaryzy 37 trıllıon dollardan asyp ketken bolatyn.