Saksonııa Federaldyq jeri úkimetiniń jáne Fraıberg taý-ken akademııasy basshylarynyń shaqyrýymen jaqynda Qazaqstannyń GFR-daǵy elshisi Bolat Núsipov Saksonııaǵa jumys saparymen bardy. Sapar barysynda Saksonııa Premer-mınıstri ákimshiliginiń basshysymen, Saksonııa Federaldyq jeriniń stats-mınıstri Frıts Ekelmen kelissózder ótip, onda nemis tarapy metallýrgııa jáne ken óndirýshi ónerkásip salalaryna mamandanǵan Qazaqstannyń oblystarymen áriptestik qarym-qatynastar ornatýǵa qyzyǵýshylyq tanytty.
Fraıberg taý-ken akademııasynyń rektory Brend Maıermen kezdesý barysynda taraptar geologııa jáne taý-ken mamandyǵy boıynsha Qazaqstannan keletin mamandardy daıyndaýǵa nıet bildirdi. Yntymaqtastyq quraly retinde nemis tarapy Fraıberg qalasynda qazaq-german «Bilim úıin» ashýǵa usynys jasady.
Frıts Ekel elimizde turaqtylyq pen ultaralyq kelisimdi qamtamasyz etýge Qazaqstan basshylyǵy úlken úles qosyp otyrǵanyn atap kórsetip, oǵan joǵary baǵa berdi. Kezdesýdiń sońynda Qazaqstan aýmaǵynda ınvestısııalyq jobalardy júzege asyrý jóninde yntymaqtastyqtyń múmkindikteri, sondaı-aq, EKSPO-2017 kórmesine qatysý týraly birqatar másele boıynsha pikir almasý ótti.
Osy kúni jergilikti jetekshi kásiporyndar basshylarynyń qatysýymen ótken dóńgelek ústel barysynda qazaqstandyq dıplomat ónerkásip pen tehnologııa salalaryndaǵy yntymaqtastyq sheńberinde qazaq-german ekonomıkalyq qarym-qatynastarynyń ózekti máseleleri jáne Qazaqstandaǵy ınvestısııalyq ahýal týraly baıandama jasady. Saksonııalyq isker toptardy Elbasy Nursultan Nazarbaevtyń «Nurly Jol – bolashaqqa bastar jol» Jańa Ekonomıkalyq Saıasatynyń negizgi maqsattary jáne mindetteri men sondaı-aq, bes ınstıtýttyq reformasyn júzege asyrýǵa baǵyttalǵan «100 naqty qadam» Ult josparynyń erejelerimen tanystyrdy.
Saksonııa Ońtústik Germanııanyń serpindi damyp kele jatqan óńirleriniń biri bolyp tabylady, onda tamaq jáne hımııa ónerkásibi, mashına jasaý, logıstıka jáne elektronıka salalary jaqsy damyǵan.
«Egemen-aqparat».