Shyǵys Qazaqstanda kóktemge ázirlik sharalary júrgizilýde. О́zge óńirlerge qaraǵanda Altaıdyń alqymyndaǵy alapta qar qalyń túsedi. Elimizdegi sý resýrstarynyń basym bóligi de Shyǵys Qazaqstan oblysynyń aýmaǵynda. Búginde óńirdiń 8 aımaǵynda qar ylǵaldylyǵynyń kóterilgeni baıqaldy. Onyń ústine sońǵy kúnderi oblys aýmaǵynda qar qatty erip, jańbyr jaýdy, kóktaıǵaq ta, burqasyn da, qatty jel de turdy. Sondyqtan, óńir turǵyndarynyń alańdaýshylyǵyn túsinýge bolady.
Jýyqta oblys aýmaǵynda 4 shaqyrymdyq tasqynǵa qarsy bóget salyndy jáne burynnan qoldanysta kele jatqan bógetterdiń 1,2 shaqyrymy jóndeýden ótip, beriktigi kúsheıtildi. Bul jóninde oblystyq tótenshe jaǵdaı departamenti basshysynyń orynbasary mindetin atqarýshy Sultan Ahmetov pen tótenshe jaǵdaıdyń aldyn alý bóliminiń basshysy Evgenıı Shatýrnyı málimdedi. Tótenshe jaǵdaı departamentiniń ókilderi sońǵy kúnderi kúnniń kúrt jylynýyna baılanysty halyqty alańdatqan saýaldarǵa jaýap berdi.
– Oblys ákiminiń qaýlysymen «2015 jyldyń kóktem maýsymyndaǵy tasqynǵa qarsy is-sharalar jospary» bekitildi. Tasqyn kezeńinde sý deńgeıi kóterilýiniń aldyn-alý jáne jedel joıý úshin Shyǵys Qazaqstan oblysy tótenshe jaǵdaılar departamentiniń 844 adamdyq jeke quramnan turatyn toby, 149 arnaıy tehnıka, 22 júzý jabdyǵy, 9 mototomp ázirlendi. Jolsyz jerlerde izdeý-qutqarý jumystaryn júrgizý maqsatynda 7 shynjyr tabandy aýyr tehnıkalarymyz bar. Tótenshe jaǵdaı oryn alǵan aýmaqty barlaý jáne zardap shegýshilerdi qutqarýǵa arnalǵan «Shyǵys Qazaqstan oblysy áýe bólimshesi» KMQK 7 tikushaǵy daıyndaldy, – dedi S.Ahmetov.
Sondaı-aq halyq, kommýnıkasııa, sharýashylyq nysandaryn qar kóshkininen qorǵaýdy qamtamasyz etý maqsatynda «Qazseldenqorǵaý» mekemesi kóshkin júretin qaýipti aımaqtarǵa baqylaý júrgizýde. 2014 jyldyń qarashasynan 2015 jyldyń aqpan aıyna deıin qar kóshkini qulaýynyń aldyn-alýǵa arnalǵan 14 shara ótkizildi.
E.Shatýrnyıdyń aıtýynsha, sońǵy jyldary bul salada qaýipsizdik sharalary kúsheıtilip, keshendi jumystar júrgizildi. Degenmen, «apat aıtyp kelmeıdi». Tabıǵattyń raıyna noqta kıgize almaısyz. Tótenshe oqıǵa oryn alǵan jaǵdaıda zardap shekkenderdi ýaqytsha ornalastyrý jáne olardy azyq-túlik, kıim-keshekpen qamtýǵa qajetti materıaldyq-tehnıkalyq resýrstar, qural-jabdyqtardyń qosymsha qory quryldy. Departamenttiń jalpy syıymdylyǵy 600 adamǵa jetetin shatyrly lageri bar.
Byltyr jazǵy-kúzgi maýsymdarda oblystaǵy qalalar men aýdandarda aıtarlyqtaı keshendi sharalar ótti. Sý deńgeıiniń kóterilýi múmkin ózenderdiń tabany tazalanyp, tereńdetilip, jaǵalaýy keńeıtildi. Aryq-kanaldar júıesi tazalandy. Janar-jaǵarmaı, qap sııaqty qajet dúnıelerdiń qosymsha qory ázirlendi. Sý tospalarynyń ahýaly qatań qadaǵalanyp keledi.
Dýman ANASh,
«Egemen Qazaqstan».
О́SKEMEN.