Túrkistan oblysynda sý tapshylyǵyn boldyrmaý jáne egin sýarýdy jaqsartý maqsatynda «Qazsýshar» mamandary «Mashkanal» sý kóterý kanalyn mehanıkalyq tazalaýǵa kiristi. Bul jumys «Dostyq» kanaly arqyly keletin sýdyń kólemin arttyrýǵa sep bolmaq, dep jazady Egemen.kz.
Túrkistan oblysynyń dıqandaryna sý jetkizý sapasyn arttyrý baǵytynda aýqymdy sharalar qolǵa alyndy. Atap aıtqanda, «Qazsýshar» RMK Túrkistan fılıaly Syrdarııa ózeninen GNS-1 sorǵy stansııasyna sý tartatyn «Mashınalyq ádispen sý kóterý kanalynyń» 2,6 shaqyrymyn mehanıkalyq jolmen tazartýdy bastady. Bul jumystar 25 shildege deıin aıaqtalýy tıis.
Fılıal málimetinshe, tazartý jumystaryna mekemeniń óz tehnıkalary jumyldyrylǵan. Kanal tolyq tazartylǵan soń, «Dostyq» kanalyna qosymsha sekýndyna 10 tekshe metr sý jiberý múmkindigi artady. Bul óz kezeginde tómengi aǵysyndaǵy sharýashylyqtardy sýmen turaqty qamtýǵa jol ashady. Sonymen qatar, «Qazsýshar» balansyndaǵy basqa da kanaldardaǵy sý deńgeıiniń kóterilýine yqpal etedi.
«Júrgizilip jatqan jumystar kelesi jyly da «Mashkanaldyń» úzdiksiz jumys isteýine múmkindik beredi. Bul ádis tek jaz kezinde júzege asady, óıtkeni basqa mezgilderde kanal sýǵa toly bolady», dedi «Qazsýshar» RMK Túrkistan fılıaly dırektorynyń orynbasary Serik Toıtanov.
Aıta keteıik, bıyl elimizdiń ońtústiginde sýarý maýsymy ádettegiden 20 kún buryn bastaldy. Buǵan sebep – jaýyn-shashynnyń azdyǵy men joǵary temperatýra. Búginde Túrkistan oblysyndaǵy sýarmaly egistikterge kezekpen sý berilýde. Jalpy óńirdiń aýyl sharýashylyǵyna qajetti sý kólemi 2,82 mıllıard tekshe metrdi quraıdy.