Búgin Shyǵys Qazaqstan oblysy О́skemen qalasyndaǵy Nursultan Nazarbaev kóshesinde ornalasqan bes qabatty kóppáterli turǵyn úıdiń shatyry otqa orandy, dep habarlaıdy Egemen.kz.
Tótenshe jaǵdaılar mınıstrliginiń málimetinshe, órtti sóndirý úshin oqıǵa ornynda órt sóndirýdiń jedel shtaby qurylyp, arnaıy tehnıka men mamandar jumyldyrylǵan. Atap aıtqanda, tilsiz jaýmen kúreske jeke quramnan 36 adam jáne 13 birlik tehnıka tartylǵan.
О́rtti sóndirý barysynda avtogıdravlıkalyq kótergish (AIK) paıdalanylǵan. Qurylǵy arqyly shatyrǵa úzdiksiz sý jetkizilip, órtti oqshaýlaý jumystary júrgizilip jatyr.
«TJM kúshteri órtten 45 adamdy, onyń ishinde 7 balany evakýasııalady», delingen habarlamada.
О́rtti tolyq sóndirý jumystary jalǵasyp jatyr.