Keshe Qyrǵyzstannyń Sholpan-Ata qalasynda IV «Meıkın Azııa» halyqaralyq mýzyka festıvaliniń jabylýy dúrkirep ótkeni týraly habar tarady. Dúrkiregeni sol, Qazaqstannyń halyq ártisi, álem tanyǵan ánshi hám kompozıtor Dımash Qudaıbergenge «Qyrǵyz Respýblıkasynyń halyq ártisi» qurmetti ataǵy berildi.
Dúnıejúzilik deńgeıdegi dúldúl 2023 jyly «Qazaqstannyń halyq ártisi» atanǵan. Dańqy jer-jahanǵa jetken Dımash ataqqa kende emes qoı, sóıtse de Alataýdyń bergi jaǵynda týǵan uldyń dańqy arǵy betinde de resmı bekitilip jatqany súıinish, árıne. Bul baýyrlas eki el arasyndaǵy jarastyqty bildirgendeı. Qyrǵyz Respýblıkasynyń Prezıdenti Sadyr Japarovtyń jarlyǵyna sáıkes marapatty Dımashqa sol eldiń Memlekettik hatshysy Marat Imanqulov tabystady.
«Meıkın Azııa» halyqaralyq mýzyka festıvali 20–22 shildede Ystyqkólde ótken. Oǵan Azııa men Eýropanyń jıyrmadan astam elinen ónerpazdar qatyssa kerek. 2013 jyldan beri uıymdastyrylyp júrgen festıvaldiń tuńǵysh bas báıgesin Dımash Qudaıbergenniń ózi qanjyǵasyna bókteripti. Osy joly festıvaldiń jabylý saltanatynda óner kórsetken ánshi álgindeı marapattan soń: «Bul marapat bolashaqta eki el arasynda myzǵymas birlik úshin jasalatyn qyzmetke avans retinde berildi dep qabyldaımyn. Qazaq pen qyrǵyz halqy dostyǵynyń sımvoly dep bilemin. Qazaq halqyna kórsetilgen qurmet dep túsinemin», depti.
Dımashtyń ákesi Qanat Aıtbaev jeke paraqshasyna: «Qyrǵyzstannyń Sholpan-Ata qalasynda ótken halyqaralyq estradalyq ánshiler festıvalinde Qyrǵyzstan prezıdenti Sadyr Japarovtyń jarlyǵymen Qazaqstannyń halyq ártisi Dımash Qudaıbergenge eki el arasyndaǵy dostyq qurmetine Qyrǵyzstannyń Halyq ártisi ataǵy berildi», dep jazdy.
Dańqty ánshimizdiń Túrki dúnıesindegi abyroıy jaqsylyqqa, birlikke jolbasshy bolǵaı!