Memleket basshysy Qasym-Jomart Toqaev Amýr oblysyndaǵy ushaq apatyna baılanysty Reseı Federasııasynyń Prezıdenti Vladımır Pýtınge kóńil aıtty, dep jazady Egemen.kz Aqordanyń baspasóz qyzmetine silteme jasap.
Buǵan deıin Reseıdiń Amýr oblysynda An-24 jolaýshylar ushaǵy apatqa ushyraǵanyn habarlaǵan edik.
Apatqa ushyraǵan áýe kemesi «Angara» áýe kompanııasyna tıesili bolǵan. Ol Habarovsk – Blagoveshensk – Tynda baǵyty boıynsha reıs oryndaǵan. Ushaq Tynda qalasyna qoný kezinde apatqa ushyraǵan. Áýe kemesi áýejaıǵa birneshe shaqyrym qalǵanda radıobaılanysqa shyqpaı qalǵan. Alǵashqy qoný áreketi sátsiz aıaqtalyp, ushaq ekinshi aınalymǵa ketkennen keıin radardan joǵalyp ketken. Keıin belgili bolǵandaı, áýe kemesi taýly aımaqtaǵy bir jotanyń etegine soǵylyp, jerge qulaǵan.
Resmı derekterge sáıkes, ushaq bortynda 49 adam bolǵan, olardyń altaýy ekıpaj músheleri, qalǵan 43-i jolaýshylar, onyń ishinde bes bala bar.