Almatynyń «Medeý» muz aıdynynda ulttyq qolónerdi nasıhattaý maqsatynda «Alaman quraq – 2025» mádenı baıqaýy ótti. Eldiń ár óńirinen 660 quraqshy qatysyp, 1 366 sharshy metrlik quraq kórpe qurady. Quraqshylardyń kóz maıyn sarqa taýysyp, qolmen tikken eńbegi Global Book of Records dúnıejúzilik rekordtar kitabyna endi.
Qazaqtyń quraq óneri tuńǵysh ret álemdik rekordqa endi. Kórsetkishke Abaı jáne Shyǵys Qazaqstan oblysynan 34 quraqshy qatysyp, úles qosty. Olardyń qatarynda Abaı oblysynan 13 muǵalim men 2 oqýshy bar. Tigin sheberleri Semeı qalasy, Aıagóz, Kókpekti, Abaı aýdandary gımnazııalar, lıseıler, mektepter men qosymsha bilim berý mekemelerinen jınalǵan.
Semeı qalasyndaǵy №19 mekteptiń muǵalimi Baqytjan Shapenova Abaı jáne ShQO qatysýshylaryna jetekshilik etip, is-sharaǵa bastap barǵan edi. Bilikti ustaz jetekshilik etken qatysýshylar Abaı aımaǵyn álemdik bıikke kóterdi. Al jobanyń negizgi avtory – Aıagóz aýdany Tańsyq aýylynyń týmasy, qolóner janashyry Nurgúl Abaıhan. Osynaý sheberdiń bastamasy ulttyq ónerdi el deńgeıinde ǵana ulyqtap qoımaı, qazaq analarynyń aýyzbirligi men eńbekqorlyǵyn, quraq quraý qabiletin álemge áıgiledi.
Abaı oblysy