Qarasaı aýdanynda 47 eldi meken bar, olardyń 38-inde medısınalyq mekemeler jumys isteıdi. Alaıda 9 eldi mekende halyq áli kúnge deıin tıisti medısınalyq qyzmetke qol jetkize almaı otyr. Sonymen qatar jumys istep turǵan 38 mekemeniń 5-eýi jalǵa alynǵan ǵımarattarda ornalasqan, bul olardyń tıimdi jumys isteýine aıtarlyqtaı kedergi keltiredi. Onyń ishinde 18 nysan 40 jyldan astam ýaqyt buryn salynǵan, tehnıkalyq jaǵdaıy qazirgi talaptarǵa saı kelmeıdi, kúrdeli jóndeýdi qajet etedi.
Osyny eskere otyryp, aýdan kóleminde 15 jańa medısınalyq mekeme salý, 3 nysanǵa kúrdeli jóndeý júrgizý qajettiligi týyndaǵan. Qazirgi ýaqytta aýdannyń Abaı, Úshterek, Qaratóbe aýyldarynda 3 medısınalyq nysannyń qurylysy júrgizilip jatyr. Sonymen qatar Qaınar, Bekbolat, Shalqar, Ulan aýyldarynda 50 adam qabyldaýǵa qaýqarly dárigerlik ambýlatorııalardyń jobalyq-smetalyq qujattamalary ázirlengen. Bul týraly Qarasaı aýdanynyń Aqseńgir, Kóktoǵan aýyldarynan otbasylyq densaýlyq saqtaý ortalyǵynyń ashylý saltanatynda aýdan ákimi Jasulan Estenov habardar etti. Rásimge oblystyq densaýlyq saqtaý basqarmasynyń basshysy Erjan Súleımenov, Májilis depýtaty Anas Baqqojaev, «Nova invest» JShS bas dırektory Qarlyǵash Ibraeva qatysty.
Ár ortalyqtyń jalpy aýdany 100 sharshy metrden asady. Onda tirkeý bólimi, jalpy tájirıbe dárigerleri men beıindi mamandar qabyldaıtyn jeti bólme bar. Ortalyqtar shamamen 3 000 turǵynǵa qyzmet kórsetedi.
«Nysan aýyl turǵyndaryn sapaly ári qoljetimdi alǵashqy medısınalyq sanıtarlyq kómekpen qamtamasyz etý maqsatynda salyndy. Qurylys jobasyn qarjylandyrý – memlekettik-jekemenshik áriptestik tetikteri esebinen, «NOVA INVEST» jaýapkershiligi shekteýli seriktestigi júrgizdi. Investısııa kólemi 49 mln teńgeni qurady. Eltaı aýyldyq okrýginde jalpy sany 24 555 turǵyn bar. Aqseńgir aýylyna qyzmet kórsetetin ýchaskege 1 340 adam tirkelgen. Buryn aýyl turǵyndaryna medısınalyq kómek 1958 jyly salynǵan, qazirgi zamanǵy talapqa saı kelmeıtin, eski ǵımaratta kórsetilgen. Jańa nysan zamanaýı ınjenerlik jelilermen, medısınalyq quraldarmen, qajetti kabınettermen tolyq jabdyqtalǵan. Medısınalyq mekeme kúnine 30 adamǵa deıin qabyldaı alady. Munda alǵashqy medısınalyq-sanıtarlyq kómek kórsetý, keńes berý, dıagnostıkalyq qyzmetter men zerthanalyq taldaýlar júrgizý múmkindigi qarastyrylǵan. Ortalyqta 1 jalpy tájirıbeli dáriger, 4 orta býyn medısına qyzmetkeri, 1 bilikti akýsher qyzmet etedi. Sonymen qatar búgin dál osyndaı medısınalyq mekeme Kóktoǵan aýlynda da ashyldy. Bul – aýdannyń medısınalyq qyzmet sapasyn arttyrýǵa baǵyttalǵan júıeli jumystardyń naqty nátıjesi», dedi aýdan ákimi.
Kóktoǵan aýlyna qyzmet kórsetetin ýchaskege 1 516 adam tirkelgen. Buryn bul aýylda medısınalyq mekeme múldem bolmaǵan. Medısınalyq kómek ýchaskelik qyzmetpen úı jaǵdaıynda ǵana kórsetilip kelgen.
Bıyl kúzde Kemertoǵan, Kókózek aýyldarynda taǵy eki jańa nysan paıdalanýǵa beriledi.
Almaty oblysy