Mádenıet jáne aqparat mınıstrligi osy jyldyń birinshi jartyjyldyq kezeńiniń qorytyndysyn shyǵaryp, onyń ishinde genderlik saıasat pen otbasyn qoldaý salasyndaǵy negizgi bastamalardy da usyndy. Qorytyndyda memleketimiz ulttyq qundylyqtardy saqtaı otyryp jáne halyqaralyq standarttardy eskerip, bul baǵyt boıynsha júıeli jumystar jalǵasyp kele jatqany aıtylady.
Bıylǵy aqpan aıynda elimizge «BUU-Áıelder» qurylymynyń Eýropa jáne Ortalyq Azııa óńiri boıynsha óńirlik dırektory Belen Sans Lıýke jumys saparymen kelgen-di. Sapar aıasynda Beıjiń deklarasııasy men is-qımyl platformasynyń 30 jyldyǵy aıasynda jáne Turaqty damýdyń 5-maqsaty – genderlik teńdikti qamtamasyz etý sheńberinde Ortalyq Azııanyń bolashaǵyna arnalǵan joǵary deńgeıdegi óńirlik kezdesýi ótken.
Sonymen qatar elimizde Respýblıkalyq reprodýktıvti densaýlyq aptalyǵy uıymdastyryldy. Osy ýaqyt aralyǵynda 20 myńnan asa is-shara ótip, oǵan 500 myńǵa jýyq adam qatysty.
Al ótken jyly Áıelder quqyǵy men balalardyń qaýipsizdigin qamtamasyz etý máseleleri boıynsha zań kúshine enip, bul shara otbasylyq saıasatty damytý baǵytyndaǵy mańyzdy qadam boldy. Atalǵan zań aıasynda Otbasyn qoldaý ortalyqtarynyń jumysy qaıta qaralyp, olar biryńǵaı úlgi boıynsha jumys isteı bastady. Nátıjesinde, ortalyqtar sany 33-ten 124-ke deıin úsh ese artty. Jyl basynan beri bul ortalyqtarǵa 100 myńnan asa adam júgingen, al 5 myńnan asa otbasyna jan-jaqty qoldaý kórsetilgen.
Astana, Shymkent, Túrkistan, Qyzylorda, Jambyl, Mańǵystaý, Batys Qazaqstan jáne Soltústik Qazaqstan oblystarynda OQO-lardyń jumys úderisterin sıfrlandyrý engizildi. Al jaqyn arada «Ata-analar akademııasy» – Ata-ana.kz onlaın platformasy iske qosylmaq.
Sonymen qatar otbasyndaǵy áke men ananyń rólin arttyrý jumystary da jalǵasyp keledi. Analar kúnine oraı elimizdiń barlyq óńirinde otbasyn nyǵaıtýǵa jáne áıelderdiń qoǵamdaǵy rólin aıqyndaýǵa baǵyttalǵan myńnan asa is-shara ótti. Ákeler kúni qarsańynda Astanada «Áke. Otbasy. Qoǵam» atty X respýblıkalyq ákeler forýmy ótti. Oǵan belsendi ata-analar, sarapshylar jáne qoǵam ókilderi qatysty.
Qazaqstan qoǵamdyq damý ınstıtýtynyń janyndaǵy otbasylyq jáne genderlik saıasat jónindegi zertteý ortalyǵy óz jumysyn jalǵastyryp keledi. Atap aıtsaq, turmystyq zorlyq-zombylyqtyń aldyn alý boıynsha Ulttyq esep daıyndaý, Qazaqstan qoǵamyndaǵy genderlik stereotıpterdi zertteý, sondaı-aq Aqparat jáne qoǵamdyq damý komıtetiniń saıtynda «Genderlik muqtajdyq pen qajettilikter kartasy» arnaıy bólimin ázirleý sekildi jumystar júrgizilip otyr.
Bul qadamdar elimizdiń árbir azamaty teń quqyq pen múmkindikterge ıe bolatyn ádiletti ári qaýipsiz qoǵam qurýǵa degen umtylysyn aıqyn ańǵartady.