2021 jyly Perızat Qaırat jalǵan qujattar arqyly ataýy zańdy túrde tirkelgen «Biz Birgemiz Qazaqstan» qoryna uqsas ataýy bar «Biz Birgemiz Qazaqstan 2030» atty qoǵamdyq birlestikti tirkegen. Bul birlestik arqyly ol anasy Ǵaını Alashbaevamen birge kópshilikke kómek kórsetý uranymen aqsha jınap, iri kólemde alaıaqtyq jasaǵan, dep jazady Egemen.kz.
Sotta anyqtalǵan derekterge sáıkes, Perızat Qaırat pen anasy:
2021 jylǵy qarasha men 2023 jylǵy qazan aralyǵynda qaıyrymdylyq ortalyǵyn salý, múmkindigi shekteýli balalarǵa kómek kórsetý jáne qoǵamdyq sharalar uıymdastyrý jeleýimen 126,7 mıllıon teńge jymqyrǵan;
2023 jylǵy qarashadan 2024 jylǵy sáýirge deıin Palestına halqyna kómek kórsetý degen syltaýmen 559,1 mıllıon teńge jınap, jeke maqsattaryna jumsaǵan;
2024 jylǵy sáýir men qarasha aralyǵynda, elimizde tótenshe jaǵdaı jarııalanǵan kezde, sý tasqynynan zardap shekkenderge kómek kórsetý degen jeleýmen 2,8 mıllıard teńge ıemdengen.
Osylaısha, alaıaqtyq jolmen jınalǵan qarajattyń jalpy somasy 3,5 mıllıard teńgeni quraǵan. Bul qarajattar Perızat Qaırat pen Gaını Alashbaevanyń jeke shottaryna aýdarylyp otyrǵan.
Tergeý barysynda olar qylmystyq jolmen alynǵan aqshany gúl bıznesine ınvestısııa salý, jalǵan mámileler jasaý, qymbat jyljymaıtyn múlik, avtokólik, zergerlik buıymdar, kıim-keshek, jıhaz satyp alý, saıahattar jáne jóndeý jumystaryna tóleý arqyly zańdastyrǵany anyqtaldy.
Is materıaldary boıynsha sot úkimi taǵaıyndalyp, eki kúdiktiniń zańsyz áreketteri dáleldendi.