Búginde elordada 481 myń jas ómir súredi. Bul kórsetkish ótken jylmen salystyrǵanda 30 myń adamǵa artqan. Onyń ústine qaladaǵy 16 joǵary oqý ornynda 95 myńnan asa stýdent bilim alyp jatyr. Osy sanattaǵy azamattardyń damýy men áleýetin arttyrýǵa baǵyttalǵan bastamalar, jobalar men baǵdarlamalar olardyń jumyspen qamtylýyna, áleýmettik belsendiligine jáne kásibı ósýine serpin berip keledi.
Astana qalasynda memlekettik jastar saıasatyn damytý baǵytynda júıeli jumys júrgizilip jatyr. Jergilikti jastar saıasaty máseleleri basqarmasynyń basshysy Samat Ibraevtyń aıtýynsha, bıylǵy jartyjyldyqta 5 023 jas jumyspen qamtylǵan. Bul kórsetkish «Jastar praktıkasy», «Qoǵamdyq jumystar» jáne «Alǵashqy jumys orny» sııaqty memlekettik baǵdarlamalar aıasynda júzege asqan.
– Jastar saıasaty – memlekettiń bolashaǵyna salynǵan ınvestısııa. Búgingi býynǵa durys baǵyt berý – erteńgi sanaly qoǵamnyń negizi. Osy baǵytta birqatar tıimdi jobalar qolǵa alyndy. Máselen, «Jasyl el» baǵdarlamasy sheńberinde eki aı ishinde 3 365 jas jumyspen qamtyldy. Maýsym sońyna deıin bul san 5 200-ge jetedi dep boljap otyrmyz. Al «Joltap» jobasy aıasynda jastar SMM, targetıng, kontent-kreator, grafıkalyq dızaın, vıdeomontaj, veb-dızaın jáne bazalyq sıfrlyq daǵdylar sııaqty 7 sıfrlyq baǵytta, sondaı-aq barısta, tiginshi, satýshy, dánekerleýshi syndy 11 jumysshy mamandyq boıynsha bilim alyp jatyr. Josparǵa sáıkes, jyl sońyna deıin 5 300 adam jumysshy mamandyqtaryn, 2 700 adam sıfrlyq baǵyttardy meńgeredi, – dedi S.Ibraev.
Sondaı-aq bıyl 5 myńnan asa erikti World Boxing Cup Astana 2025, EcoFest, BI Marathon, Kazakhstan Machinery Fair jáne basqa da iri qalalyq jáne halyqaralyq deńgeıdegi is-sharalarǵa belsendi qatysyp, uıymdastyrýshylarǵa jan-jaqty qoldaý kórsetken. Olar aýdarmashy, úılestirýshi, qonaqtardy qabyldaý men alyp júrý boıynsha qyzmetter atqarypty.
Salamatty ómir saltyn dáripteý, quqyqbuzýshylyqtyń aldyn alý baǵytynda da keshendi sharalar qolǵa alynǵan. «Esirtkisiz elorda» jobasy aıasynda reıdter, sporttyq jattyǵýlar, trenıngter, shyǵarmashylyq baıqaýlar ótken.
– Jaqynda О́temisuly atyndaǵy Oqýshylar saraıynyń aýmaǵynda esirtkige qarsy salynǵan mýral saltanatty túrde ashyldy. Bul beıne jastardy salamatty ómirge úndeıdi. «Taza Qazaqstan» aksııasy negizinde elordalyq jastar senbilikterge qatysyp, tabıǵatty qorǵaý men zııandy ádetterden aýlaq bolý mádenıetin nasıhattap keledi. Sonymen qatar «Zań jáne tártip» baǵyty boıynsha esirtkige qarsy reıdter men sporttyq is-sharalar turaqty túrde ótkizilip turady, – deıdi Astana qalalyq jastar saıasaty máseleleri basqarmasynyń basshysy.
Jastarǵa arnalǵan áskerı-patrıottyq tárbıe baǵytyndaǵy «Jas sarbaz» jobasy da bar. Onyń aıasynda 64 mektep pen 14 kolledjde 2 myńnan asa tárbıelenýshi qamtylǵan. Olarǵa arnaıylap ardagerler men batyrlarmen kezdesýler, patrıottyq án baıqaýlary, fılm kórsetilimi jáne basqa da is-sharalar ótkiziledi. Al otbasylyq qundylyqtardy nasıhattaý maqsatynda «Otbasy – baqyt mekeni» jobasy uıymdastyrylady.
Buǵan qosa qalada 10 aýla klýby jumys isteıdi. Onda 2 500-ge jýyq bala men jasóspirim 130 úıirmege tegin qatysady. Úıirmelerdiń 74-i – sporttyq, 56-y – shyǵarmashylyq baǵytta.
Qazir elordada 64 stýdenttik jataqhana bar. Bıyl taǵy 3 400 oryndyq 7 jataqhana salý jáne qaıta jańǵyrtý kózdelip otyr. Bul óz kezeginde arman qýyp kelgen jastarǵa oryn tapshylyǵyn tolyq sheshýge múmkindik beredi. Sondaı-aq Astana qalasynyń ákimdigi joǵary bilim ordalarynda oqý korpýstary men jataqhanalar salýǵa arnap jer telimderin bólip otyr.
Aıta keteıik, Samat Ibraev «Jastar» ǵylymı-zertteý ortalyǵynyń dırektory Gúlishan Nahbaevamen kezdesip, birqatar ózekti máseleni talqylady. Júzdesýde jastarmen jumys baǵytyndaǵy seriktestik, birlesken jobalar men bastamalardy júzege asyrý múmkindikteri, jastar resýrstyq ortalyqtarynyń tıimdiligin arttyrý, zamanaýı formattardy engizý jáne óńirlik deńgeıde kommýnıkasııany kúsheıtý máselelerine de erekshe nazar aýdardy.