Mańǵystaý oblysynda ekskýrsııa barysynda otbasylyq jup qaıǵyly oqıǵadan aman qalǵan. Belarýsten kelgen qonaqtar jolda órt shyqqan avtobýstyń ishinen áreń qutylǵan, dep habarlaıdy Egemen.kz Lada.kz-ke silteme jasap.
Týrıster Tatıana Gýrınovıch pen Dmıtrıı Pronevıchtiń aıtýynsha, olar demalys ornyna barýdyń ornyna, naǵyz «tozaqty» bastan ótkergen. Sapar uıymdastyrýshylyq keleńsizdikterden bastalǵan: týrfırma eshqandaı kelisimshart bermegen, al ekskýrsııaǵa arnalǵan avtobýs óte tar,10 eresek adamǵa arnalmaǵan bolyp shyqqan. Alaıda olar saparǵa shyǵýǵa kelisim bergen.
15 saǵatqa sozylǵan ekskýrsııadan keıin, keri qaıtar jolda, Aqtaýdan 90 shaqyrymdaı jerde avtobýs synyp qalǵan. Týrısterdiń aıtýynsha, olardy basqa avtobýsqa otyrǵyzǵan, alaıda ol avtobýs tolyp ketken jáne buzylǵan avtobýsty tirkep kele jatqan. Adamdardy jınalmaly oryndyqtarǵa otyrǵyzǵan.
«Kenetten aıaq astymda ot tutanyp, jalyn tóbege deıin jetti. Adamdar úreıge berilip, aıqaılap, sómkelermen, kúrteshelermen otty sóndirýge tyrysty. Biraq avtobýsta birde-bir órt sóndirgish bolmady. Júrgizýshi kelip, kimniń shylym shekkenin surady. Kóılegimniń etegi janyp, aıaǵym kúıip qaldy. Biz kúıeýim ekeýmiz óz betimizshe shyǵyp, jolshybaı kólikpen Aqtaýǵa qaıttyq», dedi Tatıana Gýrınovıch.
Týrıster qasıetti oryn Qaraman ataǵa sapar kezinde týrfırmanyń múlde daıyn bolmaǵanyn da atap ótti. Olar bul jerge qysqa sholaqty shalbarmen kelýge bolmaıtynyn jáne áıel adamdarǵa oramal taǵý mindetti ekenin eshkim eskertpegenin aıtty.
Oqıǵadan keıingi kúni, týrısterdiń aıtýynsha, týrfırma ókilderi olardyń jaǵdaıyn surap, baılanysqa shyqpaǵan. Keıin týrıster ózderi operatorǵa habarlasqan. Ol bolsa, órttiń shyǵýyna jolaýshylardyń biriniń oryndyqqa qoıǵan paýerbanki sebep bolǵanyn, sonyń saldarynan oryndyq tutanyp ketkenin aıtqan.
Tatıana men Dmıtrıı sapar barysynda oryn alǵan barlyq kemshilikterdi kompanııaǵa kórsetken. Týroperator olardy jaqyn arada joıatynyna sendirgen. Qazirgi ýaqytta týrıster týrfırmanyń ataýyn jarııalamaýdy surap otyr.
«Bizdiń maqsatymyz jazalaý emes, problemalardy sheshý. Adamdardyń jumysynan aıyrylǵanyn qalamaımyz. Biraq týrıstik kompanııalar qaýipsizdik tehnıkasynyń qarapaıym talaptaryn saqtap, klıentteriniń ómiri men densaýlyǵyna jaýapkershilikpen qaraýy tıis», dep túsindirdi olar.