Birikken Ulttar Uıymy elimizdiń Ornyqty damý maqsattaryn iske asyrý jónindegi úshinshi Erikti ulttyq sholýyn joǵary baǵalady. Halyqaralyq qaýymdastyqtyń qoldaýyna ıe bolǵan qujatta taldaý tereńdigi men múddeli taraptardy keńinen tartý jáne ornyqty damý saıasatyndaǵy ulttyq basymdyqtar qarastyrylǵan.
Elimizde Ornyqty damý salasyndaǵy ulttyq maqsattar men mindetterdi iske asyrýdy monıtorıngileý jónindegi parlamenttik komıssııa 2023 jyldan beri jumys istep keledi. Osy aralyqta Ornyqty damý maqsattaryn ilgeriletýge eleýli úles qosqan komıssııanyń qyzmeti osy saladaǵy parlamenttik baqylaý, mekemearalyq ózara is-qımyl jáne zańnamalyq qamtamasyz etýdi kúsheıtýge baǵyttalǵan.
Senat spıkeri Máýlen Áshimbaev tóraǵalyq etetin komıssııa sý men energetıka qaýipsizdigi, klımat ózgeristerin jáne ESG-qaǵıdattaryn engizýmen qosa ODM-ǵa qol jetkizýge baılanysty negizgi máselelerge den qoıǵan. Memlekettik organdar, halyqaralyq uıymdar jáne saraptamalyq qoǵamdastyq ókilderiniń qatysýymen ótken otyrystarda ornyqty damý salasyndaǵy memlekettik saıasatty jetildirý jóninde naqty usynymdar ázirlendi.
ODM Parlamenttik komıssııasynyń hatshysy Olga Býlavkına BUU DB-men birlesip, Jerdi paıdalanýdy baqylaýdy kúsheıtýge jáne brakonerlikpen kúresýge baǵyttalǵan bıoártúrlilikti saqtaý tujyrymdamasy nátıjeli jumystyń bir kórinisi deıdi. Onyń aıtýynsha, Ortalyq Azııany ornyqty damytý jónindegi keńeıtilgen otyrysta parlamentaralyq yntymaqtastyq, ODM-dy ulttyq zańnamaǵa kiriktirý jáne ornyqty maqsattarǵa qol jetkizýdegi jergilikti bılik organdarynyń rólin kúsheıtý máselelerine erekshe nazar aýdarylǵan.
«Komıssııa sondaı-aq genderlik teńdik qaǵıdattaryn quqyqtyq bazada jáne strategııalyq qujattarǵa engizýge atsalysty. Bul turmystyq zorlyq-zombylyq úshin jazany qatańdatý, «erler» salalaryna jumysqa ornalasýdaǵy burynǵy kedergilerdi alyp tastaý jáne áıelderdiń saıasattaǵy rólin arttyrý, halyqaralyq mindettemelerdi oryndaý sııaqty áleýmettik kepildikterge jol ashady», dedi O.Býlavkına.
Senat 2030 jylǵa deıin ODM-ǵa qol jetkizý úshin bıliktiń barlyq tarmaǵymen, azamattyq qoǵamnyń jáne halyqaralyq seriktesterdiń ózara tıimdi baılanys ornatýyna mán berip otyr. BUU Ekonomıkalyq jáne áleýmettik keńesiniń qoldaýymen saıası forým alańynda ODM boıynsha elimizdiń erikti ulttyq sholýyn joǵary baǵalaý, sondaı-aq halyqtyń pikirin, jahandyq maqsattarǵa qol jetkizýdegi ınklıýzıvtilik pen áriptestik tásildi eskere otyryp, óńirlik turǵyda ornyqty damý maqsattaryn oqshaýlaý úderisine elimizdiń erekshe nazar aýdaryp otyrǵanyn kórsetedi.