2025 jyldyń alǵashqy jartyjyldyǵynyń qorytyndysyna sáıkes elimizde jumyssyzdyq deńgeıi 4,6% mólsherinde saqtalyp otyr. Bul – eńbek naryǵyndaǵy turaqtylyqtyń kórsetkishi. Jumyspen qamtylǵan azamattardyń sany 9,2 mıllıonǵa jetse, onyń ishinde jaldamaly jumyskerler 7,1 mıllıondy, ózin-ózi jumyspen qamtyǵandar 2,1 mıllıon adamdy qurap otyr. Bul týraly Úkimet otyrysynda Eńbek jáne halyqty áleýmettik qorǵaý vıse-mınıstri Asqar Bıahmetov málim etti, dep jazady Egemen.kz.
Vıse-mınıstrdiń aıtýynsha, qazirgi tańda eńbek naryǵynda úsh negizgi úrdis baıqalady.
Birinshisi – sıfrlandyrý men avtomattandyrý úderisiniń jedeldeýi. Qazirgi zaman mamandyqtarynyń basym bóligi sıfrlyq saýattylyqty talap etedi.
Ekinshiden, platformalyq jumyspen qamtý men elektrondy saýdanyń aýqymy keńeıip keledi. Kóptegen azamattar onlaın-platformalar arqyly qyzmet kórsetip, frılanspen aınalysýda nemese ınternet-dúkender arqyly tabys taýyp jatyr.
Úshinshiden, elimizdegi demografııalyq ósimniń nátıjesinde eńbek naryǵyna kelip jatqan jastar sany jyl saıyn artyp keledi. Sarapshylardyń boljaýynsha, 2035 jylǵa deıin bul kórsetkish jylyna 360 myń adamǵa deıin jetýi múmkin.
Bul rette sıfrlyq daǵdylardy meńgertý, kásibı qaıta daıarlaý baǵdarlamalary men jastardy eńbekke beıimdeý aldyńǵy qatardaǵy mindet retinde belgilengen.
Budan bólek Úkimet elimizdiń ońtústik óńirlerinen soltústik óńirlerge eńbek kóshi-qonynyna yntalandyrýdy maqsat etip otyr. Bul bastama aıasynda qonys aýdarýshylarǵa áleýmettik qoldaýdyń keńeıtilgen toptamasy usynylyp, jańa ortaǵa beıimdelýine barynsha jaǵdaı jasalady.
Sonymen qatar, jastardyń bilim alyp, eńbekke aralasýyn jeńildetý úshin bilim berý júıesin jańǵyrtýǵa aıryqsha kóńil bólinetin bolady. Bul jerde basty maqsat – joǵary oqý oryndary men kolledj túlekteri eńbek naryǵynda suranysqa ıe, naqty daǵdylardy meńgergen maman bolyp shyǵýy. Iаǵnı, jastar dıplom úshin emes, naqty kásibı baǵdar men eńbekke tez aralasý úshin oqýy tıis degen ustanym basym.
Eńbek naryǵyndaǵy ashyqtyq pen ádildikti qamtamasyz etý de – basty nazarda. Osy maqsatta elektrondyq eńbek sharttaryn jáne shtattyq kestelerdi engizý jumystary jalǵasyp jatyr. Bul sharalar kóleńkeli jumyspen qamtýdy azaıtyp, eńbek qatynastaryn sıfrlyq baqylaýǵa múmkindik beredi. Memlekettik organdar úshin de, jumys berýshiler men jumyskerler úshin de tıimdi bolmaq.