QOSTANAI. 7 mamyr. Qostanaı oblystyq ishki ister departamentinde Uly Otan soǵysynyń ardageri, general-maıor Samat Bákirov atyndaǵy eskertkish-taqta ashyldy. Bul týraly egemen.kz tilshisi habarlady.
Samat Bákirov soǵystan keıingi jyldarda búkil sanaly ǵumyryn quqyq organdarynda qyzmet isteýge arnady. Ol ishki ister organdarynda taban aýdarmaı 47 jyl qyzmet etti. 1974 jyldan bastap 1990 jylǵa deıin Qostanaı oblystyq ishki ister basqarmasyna jetekshilik etti. S.Bákirov eńbegi qoǵamdyq tártip saqtaýǵa qyzmet etýdiń tamasha úlgisi boldy.
Samat Bákirov Qostanaı oblystyq ishki ister basqarmasyna jetekshilik etken jyldary tártip saqshylarynyń jumys isteýine barlyq jaǵdaıdy jasady. 1993 jyly S.Bákirovtiń buıryǵymen Qostanaıdyń irgesinde ishki ister qyzmetkerleriniń balalary úshin «Dzerjınes» emdeý-saýyqtyrý lageri ashyldy. Búginde ol S.Bákirov esimimen atalady.
Oblystyq ishki ister departamentiniń murajaıynda Jeńistiń 70 jyldyǵy qarsańynda general S.Bákirovtiń kórmesi jumys isteı bastady. Kórmede Samat Ysmaǵululynyń ómiri men qyzmeti týraly barlyq málimetterdi tabýǵa bolady.
S.Bákirov atyndaǵy qabyrǵanyń ashylýyna oblys ákimi Nuraly Sádýaqasov, oblystyq ardagerler keńesiniń tóraǵasy Kenjebek Ýkın, oblystyq IID bastyǵy Tilegen Mátkenov jáne S.Bákirovtiń urpaqtary, týǵan-týystary qatysty.
Oblys ákimi Nuraly Sádýaqasov: «Samat Ysmaǵululy tártip saqshylarynyń jumysyn jaqsartýda kóp eńbek sińirgen kisi. Osy kisiniń arqasynda Qostanaıdaǵy ishki siter basqarmasynyń jumysy jańa satyǵa kóterildi. Onyń basqarý ıásili temirdeı tártippen qatar tárbıelik baı mazmunǵa ıe bolatyn», dedi.
Názıra Járimbetova.
Derek: egemen.kz
Sýret: kostanaytany.kz