Búgingi kúni jańa mamandyqtar Atlasynda Mınıstrlik jetekshilik etetin salalar boıynsha 75 jańa mamandyq bar. Bul týraly Úkimet otyrysynda О́nerkásip jáne qurylys vıse-mınıstri Iran Sharhan málimdedi, dep jazady Egemen.kz.
Ol mınıstrlik jetekshilik etetin salalar boıynsha kadrlarǵa qajettilik shamamen 40 myń adamdy quraıtynyn atap ótti. Búgingi tańda jańa kásipter atlasy mınıstrlik jelisi boıynsha 75 jańa kásipti qamtıdy.
«Mysaly, metallýrgııa jáne taý-ken óndirisi salasynda smart júıelerdi ázirleýshi, robottandyrylǵan taý tehnıkasynyń operatory, mashına jasaý salasynda – vırtýaldy prototıpteýshi mamany, qurylysta – Big Data taldaýshysy, «Aqyldy úı» jobalaýshysy sııaqty jańa mamandyqtar paıda boldy. Sonymen qatar, bıznes prosesterdi avtomattandyrýǵa baılanysty 40-tan astam mamandyq ózgeriske ushyrady», dedi Iran Sharhan.
Bıyl 190 ınvestısııalyq jobany iske qosý barysynda mashına jasaýda taǵy 8 jańa mamandyq paıda bolatyny atap ótildi. Mysaly, olardyń qatarynda 3D basyp shyǵarý jáne dánekerleý ınjeneri, robottandyrylǵan boıaý júıeleriniń operatory bar.