Atyraý oblysynda túrli úlgidegi gıpsokarton óndiretin zaýyt elektr qýaty men logıstıka máselelerinen zardap shegip otyr. Osynyń saldarynan shyǵynǵa ushyraǵan, dep jazady Egemen.kz.
Zaýyttyń jaǵdaıyn Atyraý oblysy Inder aýdanyna jumys saparymen barǵan Májilis depýtaty Aıdarbek Qojanazarov kórip keldi. Onyń aıtýynsha «ISI Gıps Inder» gıpsokarton óndirý zaýyty qazir shyǵynǵa batyp otyr.
Atalmysh zaýyt óńirdegi iri óndiristik kásiporynnyń biri. Munda túrli úlgidegi gıpsokarton - ylǵalǵa, otqa tózimdi jáne standartty gıpsokarton óndiriledi. Sondaı-aq kásiporyn gıps, qurylysqa arnalǵan gıps buıymdaryn, áktas jáne bor shyǵaryp, óńdeıdi, jabdyqtardy jóndep, tehnıkalyq qyzmet te kórsetedi, buǵan qosa elektr energııasyn óndiredi. Qazir zaýytta 125 adam eńbek etedi, jyl saıyn óndiris kólemi 5,8 mıllıon sharshy metr gıpsokartondy qurap otyr.
Zaýyt dırektory Joldas О́mbetııarovtyń aıtýynsha, elektrmen turaqsyz qamtamasyz etilýi basty másele bolyp otyr. Kásiporyn apta boıy jaryqsyz qalady, bul óndiristiń toqtaýyna jáne jabdyqtyń isten shyǵýyna ákelgen.
«Ákimdik óńirdegi elektr energııasynyń jetispeýshiligin aıtyp otyr. Elektr jaryǵy sóndirilgen saıyn biz shyǵynǵa ushyraımyz. Tehnıka isten shyǵyp, óndiris qarqyny báseńdeıdi, al keltirilgen zalaldy eshkim ótemeıdi», deıdi zaýyt basshysy.
Sondaı-aq logıstıka máselesi de qol baılaý bolyp tur. О́nim tasymalyn qamtamasyz etetin temirjol jelisin jóndeý qajet. Alaıda qazir bul jeli jeke menshikke ótken, al ıesi ınfraqurylymdy jańǵyrtýǵa qulyqsyz.
«Biz óndiristi keńeıtýge daıynbyz, shıkizat qory, mamandar men tehnologııa bar. Alaıda logıstıkalyq shekteýler jumys isteýge múmkindik bermeı tur. Temirjol jelisin «Qazaqstan Temir Joly» ulttyq kompanııasynyń balansyna berý, máseleni edáýir jaqsartar edi», deıdi J.О́mbetııarov.
Sonymen qatar, óńirde qurylys qaldyqtaryn shyǵaratyn arnaıy polıgon joq. Qazirgi kezde kásiporyn qaldyqtardy Atyraý qalasyna tasýǵa májbúr, bul da shyǵyndy arttyryp, ekonomıkalyq tıimdilikti tómendetip otyr.
Kásiporyn basshylyǵy buǵan deıin óndiristi Atyraý oblysynda keńeıtý múmkindigin qarastyrǵanyn, alaıda sheshilmegen ınfraqurylymdyq máselelerge baılanysty ekinshi zaýytty Taraz qalasynda salýǵa májbúr bolǵanyn aıtty. Onda logıstıka men energetıka máseleleri áldeqaıda jaqsy jolǵa qoıylǵan.
«Jalpy Inder aýdanynyń áleýeti zor, mundaı óndirister – ekonomıkalyq ósýdiń negizi. Alaıda energetıka, kólik ınfraqurylymy jáne qaldyqtardy joıý syndy bazalyq máseleler sheshilmeıinshe, aýdandaǵy bul salanyń damýy baıaýlaıdy. Osy máselelerdi tıisti mınıstrlikterge jetkizemiz. Bul tek bir zaýyttyń ótinishi emes, bul óńirlik ónerkásiptik saıasatqa degen kózqarasty qaıta qaraý qajettiginiń naqty belgisi», dedi A.Qojanazarov.