Bıylǵy oqý jylynda Aqtóbe oblysynyń mektepterine 19 myńnan astam bala 1-synypqa keledi dep josparlansa, shildeniń sońyna deıin 15 170 (78,7 %)-niń qujattary qabyldanypty. Sondaı-aq oqý jyly qarsańynda paıdalanýǵa beriletin alty jańa mekteptiń tórteýi «Keleshek mektepteri», ekeýi jekemenshik bilim berý uıymy, dep habarlaıdy Egemen.kz.
Oblys ákimi Ashat Shaharovtyń tóraǵalyǵymen ótken jıynda bilim berý uıymdarynyń qurylysy men jóndeý jumystary, olardyń materıaldyq-tehnıkalyq bazasyn kúsheıtý jáne jylytý maýsymyna daıyndyqtary talqylandy. Bilim basqarmasynyń basshysy Bulbul Kúzembaevanyń habarlaýynsha, qazirgi ýaqytta 14520 orynǵa laıyqtalǵan 31 bilim berý nysanynyń qurylysy júrip jatyr. Onyń ishinde 4 balabaqsha, 26 mektep jáne 1 qosymsha bilim berý uıymy bar. Munymen qosa 11 mektep, 5 balabaqsha, 2 kolledj jáne 1 qosymsha bilim berý mekemesine kúrdeli jóndeý jumystary júrgizilip jatyr. Jóndeý jumystary 20 tamyzǵa deıin aıaqtalmaqshy
Qazirgi ýaqytta óńir mektepterinde 244 muǵalim jetispeıtin bolsa, osy tapshylyqty joǵary oqý oryndary men kolledj túlekteri esebinen jabý josparlanǵan. Sol úshin tamyz aıynda oblys jáne aýdan ortalyqtarynda muǵalimderge arnalǵan bos jumys oryndarynyń jármeńkesi ótkiziledi.
300 orynǵa laıyqtalǵan «Keleshek mektepteriniń» biriniń qurylysy – qaladaǵy «Saıajaı –1» turǵyn aýdanynda júrip jatyr. Onyń qurylysyna 3,53 mlrd teńge bólingen. Ekinshisi -«Altyn Orda» shaǵyn aýdanyndaǵy 2 myń oqýshyǵa arnalǵan, jobalyq quny –9,59 mlrd teńge bolatyn bilim berý mekemesi. Zamanaýı eki bilim oshaǵy qalanyń jańa boı kótergen aýdandaryndaǵy oryn tapshylyǵyn joıady degen senim bar.
Aqtóbe oblysy