Memleket basshysynyń tapsyrmalaryn júzege asyrý aıasynda qaıtarylǵan zańsyz aktıvter áleýmettik ınfraqurylymdy jaqsartýǵa baǵyttalyp otyr. Túrkistan oblysynda bul qarajat aýyldyq eldi mekenderdi sapaly aýyz sýmen qamtamasyz etýge jumsalady, dep habarlaıdy Egemen.kz.
Úkimet Arnaýly memlekettik qordan óńirdegi sý júıelerin salý jáne jańartý jumystaryna 20 mıllıard teńgeden astam qarajat bólgen.
«Qazir óńirde quny 5 mlrd teńge bolatyn Shardara toptyq sý qubyryn salý jumystary júrip jatyr. Qor qarajatynan Jibek joly, Sheńgeldi, Aq úı, Qaratóbe, Jýantóbe, Jańadáýir, Esikqorǵan, Quıǵan, Aqsý aýyldaryndaǵy sýmen jabdyqtaý jobalaryna 4,2 mlrd teńge bólindi», delingen habarlamada.
Sonymen qatar Saryaǵash, Qazyǵurt, Keles, Ordabasy jáne Otyrar aýdandarynda da aýyz sý ınfraqurylymyn damytý jumystary qolǵa alynǵan.
Aıta keteıik, buǵan deıin Saryaǵash aýdanynda magıstraldi sý qubyryn jańartý jobasyna Arnaýly memlekettik qordan 2,5 mıllıard teńgeden astam qarajat bólingen bolatyn. Bul joba 260 myńnan astam turǵyny bar 66 aýyldy ortalyqtandyrylǵan sý júıesine qosýdy kózdeıdi.