Halyqaralyq valıýta qory Qazaqstan ekonomıkasyna qatysty boljamyn jaqsartyp otyr. Jańa derekterge sáıkes, 2025 jyly eldiń jalpy ishki ónimi 5%-ǵa ósedi. Buǵan deıingi shilde aldyndaǵy boljam 4,9% edi – endi sál de bolsa joǵary kórsetkish tirkeldi, dep habarlaıdy Egemen.kz.
2026 jylǵa kelsek, ázirge esh ózgeris joq – ósim 4,3% deńgeıinde saqtalady.
HVQ tek Qazaqstan ǵana emes, álemniń alpaýyt ekonomıkalary AQSh, Qytaı, Eýropalyq odaq elderi boıynsha da kórsetkishterdi qaıta qarap, birshama jaqsarǵan boljamdar jarııalady.
Munaı baǵasyna keler bolsaq, Qor 2025 jyly barrel quny orta eseppen 68,18 dollar bolady dep otyr. Al 2026 jyly 64,33 dollarǵa deıin tómendeýi múmkin. Bul sáýir aıyndaǵy 66,94 jáne 62,38 dollarlyq boljamdarmen salystyrǵanda sál joǵary. Aıtpaqshy, bıylǵy ortasha baǵa 79,17 dollar shamasynda.
Baǵanyń kóterilýine ne sebep? HVQ bul jaǵdaıdy Iran men Izraıl arasyndaǵy shıelenispen baılanystyrady. Biraq soǵan qaramastan, munaı jetkizý kólemi azaımaǵan.
«OPEK+ jáne basqa óndirýshilerden kelip jatqan munaı usynysy suranystan asyp túsip otyr», deıdi HVQ sarapshylary.
El ishindegi jaǵdaıǵa kelsek, Qazaqstan ekonomıkasy bıylǵy birinshi jartyjyldyqta 6,2% ósim kórsetken. Ulttyq bank buǵan ishki suranystyń artýy men ınvestısııalyq belsendiliktiń jandanýyn sebep qylyp otyr. Sondyqtan da bıylǵy jalpy ósim 5–6% aralyǵynda bolady degen boljam jasalǵan.
«Ekonomıkanyń naqty sektorynda aıtarlyqtaı serpin baıqalady. Bul halyqtyń senimi men bıznes belsendiliginiń artqanyn bildiredi», dep atap ótti Ulttyq bank.