Qostanaıdaǵy Syrbaı Máýlenov atyndaǵy mektep-gımnazııada kórnekti aqynǵa arnalǵan memorıaldyq taqta ornatyldy. Is-shara barysynda aqyn, dramatýrg Aqylbek Shaıahmet Syraǵańnyń Qostanaıda qyzmet etken kezeńderinen syr shertse, aqynnyń uly, zań ǵylymdarynyń doktory Qasym Syrbaıuly mektep ujymyna, shákirtterge tabys tilep, rızashylyq bildirdi.
Kezinde Syraǵańnyń áńgimesin kóp tyńdaǵan, qolyna sý quıyp, dámdes bolǵan aqyn Aqylbek Qojauly qalamgerdiń shyǵarmashylyǵy men qyzmetine keńinen toqtaldy.
«Syrbaı Máýlenov – qazaq poezııasynda erekshe iz qaldyrǵan, ult óleńine jańa forma ákelgen ǵajaıyp lırık aqyn. Surapyl soǵys jyldary ózimizdiń qarashańyraq – burynǵy «Bolshevıktik jol», qazirgi «Qostanaı tańy» gazetinde redaktordyń orynbasary bolyp qyzmet atqardy. Elge sińirgen eńbegi zor edi. Ol kisiniń ómiri ólmes shyǵarmalarymen, osy gımnazııadaǵy jas urpaqtyń bilimimen jalǵasyp jatyr. Búgingi oqıǵanyń máni tereń. Aǵamyzdyń rýhy bir aýnap túsip jatqan shyǵar», dedi aqyn.
Eske alý keshinde Qasym Syrbaıuly óz atynan gımnazııa basshylyǵyna, ustazdarǵa, bilim ordasyn úzdik támamdaǵan birneshe túlekke alǵyshat tabys etti. Is-shara gımnazııanyń májilis zalynda jalǵasyn taýyp, kópshilik Syrbaı aqynnyń ómiri men shyǵarmashylyǵyna arnalǵan derekti fılmdi tamashalady.
Qostanaı oblysy