Senat tóraǵasy Máýlen Áshimbaev Almaty oblysynda Memleket basshysynyń óńirlerdiń ósip-órkendeýine jol ashatyn jańa óndiris oryndaryn damytý jónindegi tapsyrmasyn iske asyrý barysymen tanysty. Sapar aıasynda elimizdiń ońtústik-shyǵysyndaǵy mańyzdy strategııalyq jobalardyń biri – Alataý qalasyn salý josparyna basa mán berildi.
Palata spıkeri qalanyń Bas josparymen tanysyp, aldaǵy ýaqytta qolǵa alynatyn irgeli jobalarǵa nazar aýdardy. Alataýda tórt salalyq klasterdi qamtıtyn arnaıy ekonomıkalyq aımaq qurylǵan. Bular – mádenıet jáne týrızm ortalyǵy, bilim jáne medısına aımaǵy, iskerlik jáne qarjy ortalyǵy, sondaı-aq ındýstrııalyq-logıstıkalyq aýdan. Josparǵa sáıkes 2050 jylǵa qaraı jańa qalanyń turǵyndary 2 mıllıonǵa jetýi múmkin. Munda 400-den asa áleýmettik nysan salynyp, jyl saıynǵy týrıstik aǵyn 4 mıllıon adamnan aspaq.
M.Áshimbaev Alataýdy damytý aýqymdy qala salýmen ǵana shektelmeıtinin atap ótti. Onyń aıtýynsha, Memleket basshysynyń osy tapsyrmasyn sapaly iske asyrý búkil óńirdiń órkendeýine oń áserin tıgizedi.
«Alataý qalasy byltyr Prezıdent Qasym-Jomart Toqaevtyń Jarlyǵymen quryldy. Bul – Almaty aglomerasııasyna ǵana emes, búkil eldiń damýyna tyń serpin beretin perspektıvasy zor mańyzdy bastamalardyń biri. Senat óńirlerdiń múddesin qorǵaıtyn palata retinde aımaqtardyń damýyna belsendi yqpal etip keledi. Sondyqtan aldaǵy ýaqytta Alataý ınnovasııa, ınvestısııa jáne talantty jandardy tartatyn ozyq damyǵan shaharǵa aınalýǵa tıis dep esepteımiz. Osy mańyzdy jobanyń sapaly jáne ýaqtyly júzege asyrylýy úshin bárimiz kúsh salýymyz qajet», dedi M.Áshimbaev.
Sonymen qatar Senat tóraǵasy Alatau arnaıy ekonomıkalyq aımaǵynda ornalasqan iri nysandardyń qyzmetimen tanysty. Atap aıtqanda, ol úzdiksiz júk tasymalyn qamtamasyz etý jáne óńirlik saýdany damytý isinde mańyzdy ról atqaratyn «Istkomtrans» kólik-logıstıkalyq ortalyǵyna arnaıy bardy. Sondaı-aq M.Áshimbaev «FRUIT ART» JShS jemis-jıdek kombınatynyń jumysshylarymen kezdesti. Seriktestiktiń quramynda jyl boıy qulpynaı ósiretin jylyjaı kesheni, syıymdylyǵy 15 myń tonnaǵa jetetin jemis qoımasy jáne nemis tehnologııasy boıynsha jumys isteıtin sýblımasııa kombınaty bar. Bul kásiporynǵa jalpy kólemi 44 mlrd teńgeden asa ınvestısııa salynǵan. Senat tóraǵasy agroónerkásiptik keshendi odan ári órkendetýdiń jáne osy baǵyttaǵy kásiporyndardy qoldaýdyń mańyzdy ekenin aıtyp, olardyń eldiń azyq-túlik qaýipsizdigin qamtamasyz etýge tıgizetin áseri zor ekenin tilge tıek etti.