Búgin Úkimette ótip jatqan baspasóz konferensııasynda Premer-Mınıstrdiń birinshi orynbasary Roman Sklıar janarmaı baǵasyn kórshi memlekettermen teńestirý josparlanyp otyrǵanyn aıtty, dep jazady Egemen.kz.
Roman Sklıar bul qadam janarmaıdyń syrtqa satylyp ketpeýi úshin jasalatynyn túsindirdi.
«Ishki óndiristi ulǵaıtý josparyna kelsek, Shymkent munaı óńdeý zaýytynyń ekinshi kezegin salý josparlanyp otyr. Bul Shymkentte munaı óńdeý kólemin 6 mln tonnadan 12 mln tonnaǵa deıin ulǵaıtýǵa múmkindik beredi. Sondaı-aq, Pavlodar jáne Atyraý zaýyttarynyń qýatyn arttyrý baǵytynda is-sharalar qolǵa alynady», dedi Premer-mınıstrdiń birinshi orynbasary.
Qazaqstanda jylyna 85-90 mln tonna munaı óndiriledi. Bul rette elimizde suranys usynystan asyp túsedi. Bul máseleni sheshý úshin 2017-2019 jyldar aralyǵynda úsh qazaqstandyq munaı óńdeý zaýytyn rekonstrýksııalaý sátti aıaqtaldy, bul óndiris kólemin edáýir arttyrýǵa múmkindik bergen. Bul 2019 jylǵa qaraı benzın, dızel jáne avıakerosın tapshylyǵyn toqtatty.Premer-Mınıstrdiń birinshi orynbasarynyń aıtýynsha, tutynýdyń artýyna baılanysty avıakerosındi áli de ımporttaýǵa týra keledi. Sonymen qatar kórshi eldermen salystyrǵanda Qazaqstanda benzın men dızel otynynyń tómen baǵasy olardyń zańdy jáne kontrabandalyq joldarmen ketýine ákelip soǵady, bul ishki tapshylyqty týdyrady.