Merki aýdanynda aqyn, Qazaqstannyń qurmetti jazýshysy Shyryn Mamaserikovanyń mereıtoıy keńinen atalyp ótti. Ádebı keshke jınalǵan qaýym áýeli Jaýǵash batyr eskertkishine gúl shoqtaryn qoıyp, rýhyna taǵzym etti. Budan soń aýdandyq mádenıet úıiniń foıesine qoıylǵan «Aq Shyryn, aqyn Shyryn, ana Shyryn» atty kitap kórmesin tamashalady.
Keıinnen aqynnyń mereıtoıyna arnalǵan is-shara «О́leńimniń ár joly – ómirbaıan» atty shyǵarmashylyq keshke ulasty. Ádebı-mádenı keshte alǵash sóz alǵan oblys ákimi apparatynyń basshysy Lesbek Ilebaev óńir basshysy Erbol Qarashókeevtiń quttyqtaý hatyn oqyp, irgesin aýyldan alystatpaǵan aqynǵa qurmet kórsetti.
Qazaqstan Jazýshylar odaǵy basqarma tóraǵasy Mereke Qulkenov sóz alyp, Shyryn Mamaserikovany 80 jyldyq mereıtoıymen quttyqtady.
«Shyryn apaıdy jas kezimnen bilemin. Shyryn Bókeıqyzy Almatyǵa at basyn burǵanda, tutas aýyl kóship kelgendeı bolatyn. Aýylda turyp, tamasha óleńder jaza bildi. Almatydaǵy aqyndardy sol óleńderimen moıyndatty. Sizge uzaq ǵumyr, shyǵarmashylyq shabyt tileımin», dedi odaq tóraǵasy.
Án-jyrmen ádiptelgen shyǵarmashylyq kesh barysynda aıtýly aqynnyń inileri men sińlileri, qalamdas baýyrlary aqjarma tilekterin aıap qalǵan joq. Bir sózben aıtqanda, Shyryn Mamaserikova áriptesteriniń de, jergilikti atqarýshy bılik ókilderiniń de ystyq yqylasyna bólendi.
Shyǵarmashylyq kesh sońynda sóz alǵan Shyryn Mamaserikova qurmet kórsetken azamattardyń barlyǵyna rızashylyǵyn jetkizdi. Taǵdyrdyń túrli synaqtaryna tóze bilgen aqyn aldaǵy ýaqytta da Merkisinen alystamaı, tamasha óleńder jazýǵa ýáde etti.
Jambyl oblysy,
Merki aýdany