Batys Qazaqstan oblysynda bıylǵy 6 aı ishinde 563 jol apaty bolyp, 36 adam qaza tapqan. Bul týraly jergilikti polısııa qyzmetiniń bastyǵy Oljas Ybyraıymov málimdedi.
2025 jyldyń alǵashqy jartysynda byltyrǵy 434 oqıǵamen salystyrǵanda bıyl jol apaty kóbeıip ketken. Túrli dárejede jaraqat alǵan adamnyń sany da byltyrǵy 576-dan asyp, 849-ǵa jetipti.
– Apattyń negizgi sebebi – jol erejesi óreskel buzylady, ásirese jyldamdyqty shekten asyrý jıi kezdesedi. Júrgizýshiler jol qıylysy men jaıaý júrginshi ótkelinde, basyp ozý, manevr jasaý kezinde ereje saqtamaıdy. Rólde kele jatyp telefon paıdalaný da azaımaı tur. Biz osyndaı ereje buzýshylardy anyqtaý úshin jumysty kúsheıtip, jyl basynan beri kólik aıdap kele jatqanda telefondy paıdalanǵan 2 399 júrgizýshini anyqtadyq. Olardyń bári jaýapqa tartyldy. Bul baǵytta jumysty áli de kúsheıtemiz, – deıdi O.Ybyraıymov.
Saraptama oblys ortalyǵy Oral qalasy aýmaǵynda, sondaı-aq Oral-Aqtóbe, Chapaev-Jalpaqtal-Qaztalov jáne Podstepnoe-Elek tasjoldarynda ereje jıi buzylatynyn kórsetken.
Shyny kerek, búginde jol erejesi qatal deýge bolady. Tek Batys Qazaqstan oblysynyń ózinde jyl basynan beri 2 myńnan asa júrgizýshi kólik quralyn júrgizý quqyǵynan aıyrylǵan. Jol erejesiniń saqtalýyn jarııa jáne jasyryn qadaǵalaıtyn 10 «Ekın Patrol», «H spotter», «Iýtong marsh» arnaıy kólikteri, 20 «Kıber Sherıf» arnaıy kóligi oblys aýmaǵynda kúni-túni qyzmet etip, 10 myńnan asa quqyqbuzýshylyqty anyqtaǵan. Odan bólek, óńirde ornatylǵan 153 avtomatty tehnıkalyq quraldyń kómegimen 62 473 quqyqbuzýshylyq tirkelgen. Memleket paıdasyna óndirilgen aıyppul kólemi 590 mln teńgege jýyqtaǵan.
– «DJI Matrice 350 RTK» markaly ushqyshsyz ushý apparatynyń kómegimen Oral-Atyraý jáne Podstepnoe-Elek tasjoldarynan memlekettik tirkeý nómiri joq kólikterdi, ereje buzǵan júrgizýshilerdi anyqtap, ákimshilik jaýapqa tarttyq, – deıdi jergilikti polısııa qyzmetiniń bastyǵy.
Búginde oblys aýmaǵyndaǵy respýblıkalyq mańyzy bar joldarda jol qaýipsizdigin qamtamasyz etý úshin 40-qa jýyq avtopatrýl kezekshilikte júr.
Sońǵy kezde moped syndy jeńil tehnıkanyń kóbeıgeni de jol qaýipsizdigine áser etip tur. Moped mingen júrgizýshiler bıyl 10 márte jol apatyna túsipti. 9 adam jaraqat alǵan. Mas kúıinde jolǵa shyqqan, shlem kımegen, jolda kele jatyp telefonǵa alańdaǵan, júrgizýshi kýáliginsiz jáne tirkelmegen mopedti aıdaǵan 207 júrgizýshi ákimshilik jaýapkershilikke tartylypty. Sonyń 36-sy kámeletke tolmaǵan jasóspirim eken.
Qazir Oral qalasynda kóshe joldary jóndelip, kólik qatynasyna ýaqytsha qıyndyq kóbeıgen. Jaıyq ózenindegi eki kópirdiń biri de eki aptalyq jóndeýge jabylatyny habarlandy. Osynyń bári jol qozǵalysy kezinde asa abaı bolýdy talap etedi.
Batys Qazaqstan oblysy