Qulsary qalasynda turatyn Baýyrjan Hasanuly júzim ósirýge 6 sotyq jer alǵan. Sodan beri tátti jemisten ónim jınaýdy kásip etedi.
Qazir onyń aýlasynda júzimniń birneshe túrin beretin 20 túp ósip tur. Odan jyl saıyn shamamen 2 myń kóshet alady. Jemis beretin kóshetke elimizdiń ár óńirinen, 4 shetelden tapsyrys túsedi.
«Alǵashynda О́zbekstanda ósetin júzim túrlerin zerttedim. Bul jemisti ósirýdiń ózindik qıyndyǵy bar. Onyń qyr-syryna qanyǵyp, biraz tájirıbe jınadym. Sóıtip, 2012 jyly júzimniń mol ónim beretin birneshe kóshetin ektim», deıdi B.Hasanuly.
Qazir onyń baqshasynda Iýbıleı Novocherkasska, Nına, Rızamat, Zarevo, Pamıatı Djeneeva, Krasava, Alvıka, Velıka, Manıkıýr fınger, Dneprovskıı sývenır, Vıktor, Rızamat ata, Nadejd Azos, Pamıatı Nıgrýlıa, Vodograı, Kodrıanka, Krasotka, Avatar, Nahodka Kalýgına dep atalatyn júzim túrleri ónim beredi. Júzimniń bul túrlerinen jyl saıyn shamamen 500 kılo ónim jınaıdy. Keıin odan kúndelikti dastarqanǵa qoıylatyn meıiz, shyryn, jemis qaınatpasy men tosap daıyndaıdy.
«Júzimniń erekshe sorttaryn shetelden arnaıy aldyramyn. Bizdiń óńirdiń tabıǵatyna beıimdeımin. Basty maqsatym – júzim sharýashylyǵyn quryp, el naryǵyn tolyqtaı otandyq júzimmen qamtamasyz etý. Eksportqa ónim shyǵaryp, el ekonomıkasynyń órkendeýine de úlesimdi qossam deımin. Jańa sorttar shyǵarý úshin memleketpen birlesip arnaıy zertteý ınstıtýtyn qurý ıdeıasyn kóterip júrmin», deıdi júzim ósiretin jigit.
Onyń bastamasyn iske asyrý úshin aýqymdy jer telimi qajet. Sondaı-aq ǵylymı zertteý jumysyn júrgizetin ınstıtýtty jandandyrýǵa keminde 15–20 jyl ketýi múmkin.
Baǵban jigit «Baýyrjan júzimderi» brendin qalyptastyrdy. Keıingi úsh jylda osy brendpen júzim festıvalin ótkizdi. Atalǵan festıvalǵa múmkindigi shekteýli jandardy shaqyryp, olarǵa qoldaý kórsetti.
Atyraý oblysy