Elimizde jolaýshylar poıyzǵa keshikken jaǵdaıda bıletiniń qunyn tolyǵymen joǵaltpaı, onyń bir bóligin qaıtaryp alýyna múmkindik bar. Bul týraly «Jolaýshylar tasymaly» aksıonerlik qoǵamy resmı túrde habarlady, dep jazady Egemen.kz.
Kompanııa málimetinshe, eger jolaýshy bıletinde kórsetilgen stansadan poıyz jóneltilgennen keıin bir saǵattyń ishinde vokzal kassasyna júginse, bılet qunyn jartylaı qaıtaryp ala alady. Alaıda bul múmkindikti paıdalaný úshin naqty talaptar saqtalýy tıis.
«Aldymen jolaýshy vokzaldaǵy bılet kassasyna barýy kerek. Qaıtarý rásimi úshin jeke kýálik pen bılet qajet. Bılet qunyn qaıtarý mólsheri men merzimi temirjol kóligimen jolaýshylardy, bagajdy jáne júk tasymaldaý erejelerine sáıkes júzege asyrylady», delingen kompanııa taratqan aqparatta.
Eger jolaýshy poıyz ketkennen keıin bir saǵattan keshigip kelse, onda bılet quny qaıtarylmaıdy. Sondyqtan osyndaı jaǵdaıda ýaqyt ozdyrmaı, dereý vokzal kassasyna júginý qajet.