Bıyl adamzattyń aqyl aldaspanyna aınalǵan qazaqtyń uly aqyny Abaı Qunanbaıulynyń týǵanyna – 180 jyl. Tarbaǵataıdan bastaý alǵan torqaly toı dúbiri búginde qazaq dalasyn sharpyp jatyr. Oı kemeńgeriniń onkúndigi aıasynda Astanadaǵy qalamgerler alleıasynda da aqynnyń shyǵarmashylyǵy sharyqtady. Súbeli sózdi serik etken jannyń jan qaltasynan tabylatyn aqyn murasy búgin ashyq aspan astynda kópshiliktiń nazaryna usynyldy, dep jazady Egemen.kz.
Elorda ákimdiginiń «Ortalyqtandyrylǵan kitaphanalar júıesi» KMM uıytqy bolǵan sharanyń ótýine Amanat partııasynyń «Almaty» aýdandyq fılıaly qoldaý kórsetken. Jas pen jasamys bas qosqan jyr keshine Qazaqstan Jazýshylar odaǵy Astana qalalyq fılıalynyń tóraǵasy, aqyn Baýyrjan Babajanuly, qazaq ádebıetiniń kórnekti ókili Álibek Asqarov, aqyn Maqpal Mysa qatysty. Qalam ustaǵan qaýym aqynnyń ult rýhanııatyna qosqan ólsheýsiz ónegesiniń ólmeıtinin, kerisinshe ýaqyt ozǵan saıyn quny qymbattaı túskeni týraly tushymdy oı terbedi.
«Uly Abaı ár qazaqtyń júreginde, rýhynda úıinde aıtylatyn, aqyl beretin tumaryndaı bolý kerek. Al kitaphanalar júıesi álem tanyǵan, álemge qazaqty tanytqan Abaıdyń nasıhattaý jolynda tárbıe, tanymdyq, tarıhı saǵatpen qatar kitap kórmelerin uıymdastyryp jatyr. Ondaǵy basty maqsat Abaıdyń janyn, júregin, sózin, ónerin, óleńin jas urpaqqa túsindirý. Aqynnyń ónegesin jadyna toqyp ósken jas eshqashan jaman bolmaıdy», dedi mádenıet salasynyń úzdigi, kitaphana ardageri Saǵynysh Dúısenqyzy.
Shyǵarmashylyq keshte kemel adam bolýǵa umtylǵan oqýshylar uly tulǵanyń kesek oılaryn, kósemsózderin jatqa oqydy. Urpaq uǵýy tıis adamdyq álippesiniń ár tarmaǵy jastyń kómeıinen aqtarylǵany keshtiń dittegen maqsatyna jetkenin ańǵartsa kerek.
«Abaı Qunanbaıulynyń óleńderin mektep tapsyrmasynan bólek te oqýdy ádetke aınaldyryp kelemin. Onyń qarasózderindegi oılar balalardy eńbekqor bolýǵa shaqyrady. Jıi oqı tússek, biz de aqyldy bala bolyp er jetip, bilim alýdyń mańyzyn túsinemiz», deıdi 58 mektep-gımnazııanyń 5-synyp oqýshysy Aısha Baıbolatova.
Shara sońynda balalar Abaı súıgen toǵyzqumalaq oıynynan básekege túsip, aqyn áni áýelep, kúıi kúmbirledi.