Bıylǵy jyly múgedektik tobyn belgileýge medısınalyq-áleýmettik saraptama júrgizýdiń syrttaı formaty qarqyndy júrgizildi. Nátıjesinde, qanatqaqty joba aıasynda barlyq óńirden 61,9 myń ótinim qaraldy. Búginde syrttaı formatta kýálandyrý 30 nozologııalyq nysan boıynsha iske asady.
Byltyr 96,9 myńnan astam ótinim syrttaı formatta qaralyp, kýálandyrýdan ótken múgedektigi bar adamdardyń jalpy sanynyń 37,4%-yn qamtydy. Memleket basshysy erekshe qajettilikteri bar adamdarǵa barynsha qolaıly jaǵdaı jasaýdy tapsyrǵan-dy. Olar ınstansııalardan ótýde qaǵazbastylyqtan arylýǵa tıis ekenin qatań eskertti. Osy tapsyrmany oryndaý maqsatynda Eńbek jáne halyqty áleýmettik qorǵaý mınıstrligi Densaýlyq saqtaý, Sıfrlyq damý, ınnovasııalar jáne aeroǵarysh ónerkásibi mınıstrlikterimen birlesip elimizdiń barlyq 20 óńirinde qanatqaqty rejimde medısınalyq-áleýmettik saraptama (MÁS) júrgizýdiń syrttaı formaty jobasyn iske asyryp jatyr.
Múgedektik tobyn belgileý jónindegi qyzmetti alýǵa ótinish berýshige turǵylyqty jerindegi emhanaǵa júginý, qajetti tekserýden ótý kerek, qalǵan úderister júıelerdi ıntegrasııalaý esebinen onyń qatysýynsyz oryndalady.
Syrttaı kýálandyrýǵa kóshý birinshiden, ákimshilik hám bıýrokratııalyq kedergilerdi joıady. Ekinshiden, MÁS saraptamalyq sheshimderiniń ashyqtyǵyn qamtamasyz etedi. Sonymen qatar múgedektikti belgileý, múgedektigi bar adamdardy áleýmettik qorǵaý sharalaryn anyqtaý qyzmetterin úıden shyqpaı-aq alýǵa múmkindik beredi. Eń bastysy, kórsetiletin qyzmetti alýshynyń kórsetiletin qyzmetti berýshimen tikeleı baılanysy bolmaıdy, sol arqyly sybaılas jemqorlyq táýekelderi azaıady.