Premer-mınıstr Oljas Bektenovtiń tóraǵalyǵymen ótken Úkimet otyrysynda saýda salasyn sıfrlyq transformasııalaý men damytý bolashaǵy qaraldy. Sondaı-aq ana men bala ólimin azaıtý máselesi de kún tártibine shyqty.
Saýdanyń sıfrlyq aınasy
Qoldanysqa jańadan engizilip jatqan «Saýdanyń sıfrlyq aınasy» modeli óndirýshiden tutynýshyǵa deıingi taýar qozǵalysyn tolyq sıfrlandyrady. Bul model taýardyń kod berý men ákelýden bastap dúkendegi satylym men tutynýshyǵa jetkizilýine deıingi barlyq kezeńdi tirkep turady. Osylaısha, taýardyń tutas sıklyn qamtıtyn tolyq sıfrlyq ekojúıe qurylady.
«Bıyl taýar men jumystyń, sondaı-aq kórsetiletin qyzmettiń jalpy klassıfıkatoryn júrgizý tártibi men Ulttyq taýarlar katalogi uǵymyn jáne mindetti túrde qoldanýdy kózdeıtin qajetti zańnamalyq normalar qabyldandy», dedi Saýda jáne ıntegrasııa mınıstri Arman Shaqqalıev.
Jańa ereje men tártipti táptishtegen mınıstr, memlekettik apparatty vedomstvoaralyq úılestirýdi kúsheıtý men qaǵaz túrindegi «jalǵan sertıfıkat» máselesin sheshý kerek ekenin aıtty. Munymen birge, tehnıkalyq retteýdiń aqparattyq júıesindegi «Keden» aqparattyq júıesin, Ishki ister, Ǵylym, Eńbek mınıstrlikteriniń júıelerimen, memlekettik satyp alýlar pasportyn, marketpleıster men Eýrazııalyq ekonomıkalyq odaqtyń tizilimimen ıntegrasııalanatynyna toqtaldy.
«Memleket basshysy ekonomıkanyń barlyq salasyn sıfrlyq transformasııalaý mindetin qoıdy. Kórip otyrǵanymyzdaı, saýda salasynda júıeli jumys júrip jatyr. Taýarlardy tolyq qadaǵalaý jáne sáıkestendirý aıasynda Taýarlardyń ulttyq katalogi engizilýde. Bul taýarlardy óndirýden nemese ákelýden bastap, kóterme jáne bólshek saýdada ótkizýge deıingi barlyq kezeńde olardy jikteýge negiz bolady. «Astana-1» jáne «Elektrondyq shot-faktýralar» aqparattyq júıeleriniń ıntegrasııasy qamtamasyz etildi», dedi Úkimet basshysy.
Alaıda taýarlardy sıfrlyq qadaǵalaýdyń qoldanystaǵy júıesi ónimderdiń shekteýli sanattaryn ǵana qamtıdy jáne ár jerde bólek-bólek ornalasqan anyqtamalyqtar men derekter formatyna súıenedi. Osyǵan baılanysty Qarjy jáne Saýda mınıstrlikteri basqa da memlekettik organdarmen birlesip, Taýarlardyń ulttyq katalogin barlyq salada engizý jumysyn kúsheıtýi qajet.
«Bıznesti osyǵan belsendi túrde atsalysýǵa shaqyramyn. Tehnıkalyq retteý – mańyzdy másele. Kásipkerler sertıfıkattaý rásimderiniń ashyq bolmaýy men qaǵaz qujattardyń qaıtalanatynyn aıtyp jatyr. Bul máselelerdi sertıfıkattaý, akkredıtteý jáne standarttaý tetigin jańǵyrtýǵa baǵyttalǵan E-TRMK tehnıkalyq retteý júıesi sheshýge tıis. Osyǵan baılanysty Saýda, Qarjy, Sıfrlandyrý mınıstrlikteri jyl sońyna deıin E-TRMK júıesin salalyq memlekettik organdardyń aqparattyq júıesimen tolyq ıntegrasııalaýy kerek», dedi O.Bektenov.
Úkimet basshysynyń aıtýynsha, Saýda mınıstrligi tarapynan tańbalaýdyń mańyzdylyǵy men oń áseri týraly kásipkerlerge tıisti túsindirý jumysy júrgizilmegen.
«Sondyqtan aqparattyq-túsindirý naýqanyn kúsheıtip, tańbalaýǵa jatatyn taýarlar tizbesin keńeıtýdi jalǵastyrý kerek. Sondaı-aq agromarketpleıs pen qadaǵalaý júıesin iske qosý jónindegi bastamalardyń mańyzdylyǵyn atap ótkim keledi. Olar aýyldyq eldi mekenderde ekonomıkalyq belsendiliktiń ósýine yqpal etedi. Syrtqy saýda qyzmeti aıasynda taýarlardy ákelý úderisterin avtomattandyrý, mámilelerdiń ashyqtyǵy men sertıfıkattaý máselelerinde bızneske kómek kórsetý qajet. Saýda mınıstrligine «Qazposhtamen» birlesip, jyl sońyna deıin V2V elektrondyq saýda alańynyń qanatqaqty jobasyn iske qosýdy tapsyramyn. Osy máselelerdiń barlyǵy ıkemdi vedomstvoaralyq ózara is-qımyldy jáne bıznespen turaqty ashyq dıalog júrgizýdi talap etedi», dedi Premer-mınıstr.
Densaýlyq salasynda jańa jospar bekitildi
2029 jylǵa deıingi Ulttyq damý josparynda ana men bala ólimin tómendetý boıynsha keshendi sharalar qabyldaýǵa erekshe basymdyq berilip otyr. Osyǵan baılanysty Densaýlyq saqtaý mınıstrligi 2030 jylǵa deıin ana men bala densaýlyǵyn saqtaý qyzmetin damytý josparyn bekitipti. Bul týraly Úkimet otyrysyndaǵy baıandamasynda sala basshysy Aqmaral Álnazarova aıtty.
«Qabyldanǵan sharalar ana men bala ólimi kórsetkishterin tómendetýge múmkindik berdi. Árıne, bul – medısına qyzmetkerleri eńbeginiń nátıjesi. Aýyldyq jerlerge bilikti kadrlardy tartý men olardy ornyqtyrý bolashaq analar men balalar úshin qoljetimdi medısınalyq kómek alýǵa jaǵdaı jasaıdy. Sonymen qatar akýsher, gınekolog, neonatolog, pedıatr men reanımatologterdi jetekshi otandyq jáne sheteldik ortalyqtarda turaqty oqytý men qaıta daıarlaý jumystaryn odan ári jalǵastyrý qajet. Biz damyǵan elderdiń kórsetkishterine jaqyndaý úshin bosaný kezindegi kúrdeli ári qaýipti jaǵdaılardyń aldyn alý boıynsha jumysty kúsheıtýimiz qajet. Densaýlyq saqtaý júıesin durys uıymdastyrǵan jaǵdaıda, kózdegen maqsatqa qol jetkizýge bolady. Keıingi jyldary ana men bala ólimin 6 eseden astam tómendete aldyq», dedi O.Bektenov.
Úkimet basshysy azamattardyń sapaly ári qoljetimdi medısınalyq kómek alýyn qamtamasyz etý úshin atqarylatyn mańyzdy sharalardy atap ótip, naqty tapsyrma berdi.