Memleket basshysynyń tapsyrmasyn júzege asyrý sheńberinde qaıtarylǵan aktıvter qarajaty esebinen áleýmettik nysandar salý jumystary jalǵasyp jatyr. Úkimettiń baspasóz qyzmetiniń habarlaýynsha Arnaýly memlekettik qordan Qyzylorda oblysyndaǵy densaýlyq saqtaý salasyndaǵy birqatar jobaǵa shamamen 7 mlrd teńge bólindi, dep jazady Egemen.kz.
Atalǵan somadaǵy qarajat – Aral, Qazaly, Shıeli, Jańaqorǵan aýdandaryndaǵy ortalyq aýdandyq aýrýhanalar janynan jańa ǵımarattar salýǵa baǵyttalǵan. Onda ınsýlt ortalyqtary, rentgenhırýrgııa bólimsheleri jáne basqa da beıindi bólimder ashylyp, zamanaýı medısınalyq jabdyqtar: magnıttik-rezonanstyq tomografııa, kompıýterlik tomografııa jáne angıografııalyq qondyrǵylar ornatylady.
Jobalar júzege asqan soń, aýyldyq jerlerdegi 300 myńnan astam turǵyn mamandandyrylǵan medısınalyq kómekke qol jetkizedi.
Nysandardy paıdalanýǵa berý bıylǵy jylǵa josparlanǵan.