О́skemen qalasynda Ǵazız Baıtasov atyndaǵy XX mereıtoılyq respýblıkalyq jas jol ınspektorlary (JJI) slıotiniń saltanatty ashylýy ótti, dep jazady Egemen.kz.
Ishki ister mınıstrliginiń bastamasymen ótetin slıot ósip kele jatqan urpaqtyń jolda qaýipsiz júrý mádenıetin qalyptastyrý, quqyqtyq saýattylyǵyn arttyrý, jaýapkershilik pen azamattyq borysh sezimin damytýdy kózdeıdi.
Bıylǵy slıotke elimizdiń 20 óńirinen kelgen JJI komandalarymen qatar, Qyrǵyz Respýblıkasynyń ókilderi de qatysyp jatyr. Birneshe kún boıy qatysýshylar jol qozǵalysy erejeleri boıynsha bilimderin, alǵashqy medısınalyq kómek kórsetý daǵdylaryn kórsetip, balalar men jasóspirimderdiń qatysýymen bolatyn jol-kólik oqıǵalarynyń aldyn alý boıynsha shyǵarmashylyq jumystaryn usynady.
Saltanatty ashylý rásiminde qatysýshylardy Ishki ister mınıstrligi Ákimshilik polısııa komıtetiniń tóraǵasy Qaısar Sultanbaev quttyqtady. Ol JJI qozǵalysynyń jastardyń quqyqtyq sanasyn qalyptastyrýdaǵy mańyzdylyǵyna toqtaldy.
«Jas jol ınspektorlary – bul jaı ǵana mekteptik uıymdar emes. Bul qozǵalys jas býynǵa qaýipsiz júris-turys mádenıetin sińiredi, zań men tártipke qurmetpen qaraýdy qalyptastyrady, jaýapkershilikti arttyrady. Slıotke qatysý sizderge jańa bilim, jarqyn áser jáne senimdi dostar syılaıtynyna senimdimin», dedi ol.
Shara barysynda Shyǵys Qazaqstan oblysy ákiminiń orynbasary Jaqsylyq Omar da sóz sóılep, slıot qatysýshylaryna jyly lebizin bildirdi. Ol JJI qozǵalysyna qatysýshy balalar sanynyń jyl sanap artyp kele jatqanyn atap ótti.
«Bul qozǵalysqa qyzyǵýshylyqtyń artýy qýantady. JJI — bul eń belsendi ári sanaly oqýshylardy biriktiretin uıym. Olar - bizdiń bolashaǵymyz. Tártipti, jaýapty ári el taǵdyryna beı-jaı qaramaıtyn urpaq», J.Omar.
Saltanatty ashylýda Shyǵys Qazaqstan oblysy Polısııa departamentiniń hory án shyrqap, odan keıin túrli bı toptarynyń óneri kórermenge usynyldy. Is-shara jas jol ınspektorlarynyń Gımnin oryndaýmen jáne jarystarǵa resmı túrde bastaý berýmen aıaqtaldy.
Slıot qatysýshylary alda túrli baıqaýlar, bilim men sheberlikterin synǵa salady.