Elimizdiń jastary bilim jarystarynda jıi top jaryp júr. Osyndaı jetistikke jetýimizge el ishindegi bilikti muǵalimderdiń úlesi zor. Solardyń biri – Almatydaǵy №134 lıseıdiń matematıka páni muǵalimi, bloger Evgenıı Solonısyn. Ol jastardyń pánge degen qyzyǵýshylyǵyn oıatýdyń tyń joldaryn tapqan.
«Men Almatyda týyp-óstim. Qazir 24 jastamyn. 19 jasymnan bastap matematıka páninen sabaq berip kelemin. Otbasym qarapaıym: anam – logoped, ákem – ınjener. Anam meniń pedagogıkalyq qabiletimdi alǵashqylardyń biri bolyp baıqaǵan. Basynda baǵalarym joǵary bolǵan joq, kóbine úsh alatynmyn. Biraq 8-synyptan keıin fızıka-matematıka mektebine aýysyp, jaqsy muǵalimniń arqasynda pánge qyzyǵýshylyǵym oıandy», deıdi ol.
Jas ustaz Ál-Farabı atyndaǵy QazUÝ-da radıotehnıka jáne telekommýnıkasııalar mamandyǵy boıynsha bilim alǵanymen, keıin bul salanyń ózine jat ekenin túsingen. Osy kezden bastap repetıtor bolyp, aqyrynda ustazdyqqa bet burǵan. «Pandemııa kezinde onlaın formatqa alǵash kóshkenderdiń birimin. Osy sát men úshin úlken múmkindikke aınaldy. Oqýshylar kóptep kele bastady. Sarafandyq jarnama arqyly klıent kóbeıip, óz aýdıtorııam qalyptasty. Keıin Qazaq ulttyq pedagogıkalyq ýnıversıtetinde magıstratýra bitirip, ózim oqyǵan №134 lıseıge ustaz bolyp ornalastym», deıdi pedagog.
Ol búgingi bilim berýdegi basty másele – pánniń shynaıy ómirmen baılanysyn túsindire almaý ekenin aıtady. Sondyqtan óziniń avtorlyq ádistemesinde eń aldymen formýlanyń ómirdegi mańyzyn kórsetip alýǵa tyrysady. «Mysaly, aǵashtyń bıiktigin qalaı esepteımiz? Balalarmen birge taýǵa shyǵamyz, Medeýdegi kólikterdi sanap, ekologııalyq áserin salystyramyz. Oqýshylar ózderi qoǵamdyq kólikke kóshýdiń joldaryn usynady. Taldaý, esep, qorytyndy – bári matematıka arqyly jasalady. Balalar oılanyp, ortaǵa pikir aıtady. Men úshin eń mańyzdysy – olardyń sanasyna oı salý», deıdi matematıka páni muǵalimi.
E.Solonısyn – zamanaýı muǵalim. Ol «TikTok», «Instagram» jelilerinde 350 myńnan astam oqyrmany bar bloger. Bul platforma oǵan bilim berý júıesin tereńirek túsinýge múmkindik bergen. «Blog júrgizý arqyly qandaı tapsyrma berýge bolady, ne qyzyqty, ne qıyn – bárin saralaımyn. Jeke kýrstar ashyp, 6-synyp oqýshylarymen jumys isteı bastadym. Jańa jyldan bastap 7–8-synyptarǵa da top ashqym keledi», deıdi ol.
Jas muǵalimniń taǵy bir ustanymy – bala ustazdan qoryqpaýy kerek. Sabaq qyzyqty bolýy úshin ózi de jigerli ári sergek bolýǵa tyrysady. «Meni keıde mektep kúzetshileri «oqýshy» dep shatastyryp, toqtatady. Al synypta basynda tártip ornatý qıyn boldy. Qazir balalarmen jaqsy baılanys ornady. Olar meni aǵasyndaı kóredi. Menińshe, bala úshin oqý – aýyr júk emes, qyzyqty sapar bolýy kerek. Qatal muǵalimder kóp oqýshynyń pánge degen yntasyn joǵaltady», deıdi ol.
Solonısyn elimizde STEM tujyrymdamasynyń keń taralýyn qoldaıdy. Ol pánaralyq baılanysty kúsheıtý kerektigin aıtady. Sebebi matematıka – tek formýla emes, ómirge qajet túsinik. «Jekemenshik mektepterde matematıka bıologııamen, ekologııamen baılanystyrylady. Al qarapaıym mektepterde bul tájirıbe joq. Qarjy da, qoldaý da az. Kóp muǵalimder baıaǵy tásilmen sabaq beredi. Al qazir zaman ózgerdi. Balanyń nazaryn ustaı almaıtyn ustaz – jańa bilim berý júıesinde kópke bara almaıdy», deıdi Evgenıı.
Onyń ustazdyq mıssııasy – balanyń logıkasyn oıatyp, sanasyna dán egý. Ol bolashaqta sol dán tamyr jaıyp, úlken ózgeristerge ulasady dep senedi. Elimizdegi eń kreatıvti ustaz – osylaısha oqýshy júreginen oryn taýyp otyr.