О́ńirdegi jer qoınaýyn paıdalanýshy kompanııa ókilderi Aqtóbedegi arnaýly tehnıka shyǵarýǵa mamandanǵan «Truck Center» kásipornynyń jumysymen tanysty. Jylyna 300-den astam kólik qurastyryp, satylymǵa shyǵaryp otyrǵan kásiporyn ónimderi ındýstrııalyq jáne sapa sáıkestigi sertıfıkattarymen rastalǵan.
«Mundaı kezdesýdi uıymdastyrýdaǵy maqsat – iri kompanııalardyń elimizde qurastyrylǵan kólikterdi satyp alýyna múmkindik berý, osy joldaǵy túıtkildi máselelerdi bir ústel basynda talqylaý», deıdi oblystyq kásipkerler palatasynyń ınvestısııalyq jobalardy súıemeldeý bóliminiń basshysy Nurlan Qusaev.
Kásiporyn 2018 jyly quryldy. Alǵashqyda syrttan arnaýly tehnıka tasysa, birte-birte álemdegi iri avtokólik shyǵaratyn birneshe zaýyttyń kólik satý, servıstik qyzmet kórsetý jáne qosalqy bólshekter jetkizýmen aınalysatyn dılerine aınaldy. Tájirıbe jınaı kele, óndiristi de jolǵa qoıdy. «Jasyratyny joq, bizde ınjener-tehnık mamandar, konstrýktorlar jetispeıdi. Kásiptik-tehnıkalyq kolledj stýdentterin oqytyp-úıretýge shaqyramyz», deıdi «Truck center» JShS dırektory Maııa Reze.
Keıingi jyldary elimizde janǵysh, tez tutanatyn qospalary joq suıyq qaldyqtardy tasymaldaýǵa arnalǵan vakýýmdyq kólikter, birneshe qyzmetti qatar atqaratyn kommýnaldyq tehnıka túrleri úlken suranysqa ıe bolyp júr. Soǵan oraı munda negizinen, «KamAZ» shassıindegi aralas jol kólikteri, vakýýmdyq avtotehnıka, ballon tasýǵa, qoqys shyǵarýǵa arnalǵan kólikter qurastyrylady.
«Jaqynda Aqtóbe qalasynyń turǵyn úı-kommýnaldyq sharýashylyq, jolaýshylar kóligi jáne avtomobıl joldary bólimi bizden birneshe vakýýmdyq avtokólik satyp aldy. О́ndiriste tehnıkalyq tapsyrmalardy úsh konstrýktor oryndaıdy. Kólikterdi tapsyrys berýshilerdiń qalaýymen ózgertip te beremiz. Máselen, qaladaǵy kommýnaldyq sý sharýashylyǵy mekemesi apattyq-qutqarý jumystaryna mamandaryn tasıtyn kólik tóbesin jabdyqtaryn ornalastyratyndaı etip ózgertýge tapsyrys berdi. Sondaı-aq bir oblystyń tótenshe jaǵdaılar departamentiniń reıdtik jumystarǵa arnalǵan 28 oryndyq kóligin qurastyryp, ishki qabyrǵasy men buryshtarynyń beriktigin kúsheıttik. Taǵy bir óńirdiń jol-kólik baqylaý basqarmasyna tıesili «Gazel» kóligine jyljymaly avtomattandyrylǵan ólsheý keshenin ornatyp jatyrmyz. Mundaı kólikter aıaz ben boranda, kúz ben kóktemniń laısań, taıǵaqty kúnderinde syrttaǵy joldarda baqylaý júrgizýge jaıly ári jabdyqtardy ornalastyrýǵa qolaıly. Kınologterge arnalǵan taǵy bir kólikti qaıta jabdyqtap jatyrmyz», deıdi «Truck Center» seriktestiginiń ıesi Ivan Zaharov.
Qazir tasjoldarda júrýge laıyqtalǵan iri kólikterge qaraǵanda sharýashylyqqa qolaıly shaǵyn kólikter suranysqa ıe. Máselen, aýyl sharýashylyǵynda jer jyrtyp, júk tasyp birneshe qyzmetti qatar atqaratyn, soqasy men tirkemesi bar, baǵasy qoljetimdi shaǵyn traktorlar kóptep qajet. Joǵaryda atap ótkenimizdeı, qoqys jınap, kósheni sypyryp-jýyp, birneshe qyzmetti qatar atqaratyn tehnıkaǵa da suranys joǵary. Orman órtteriniń kóbeıýine baılanysty endi tutanǵan jalyn oshaǵyna jedel jetetin yńǵaıly kólikterge de tapsyrys jıi beriledi. Mysaly, «Pıkap» kóligine 800 lıtrge deıin sý quıylǵan bóshkeler syıady jáne qural-saımandardy alyp júrýge bolady. Jobalap-qurastyrýshylar orman sharýashylyǵy mekemeleri úshin pıkaptardyń artqy tirkemesine bıikteý etip qorshalǵan jalpaq júk alańyn qurastyryp jatyr.
Kásiporyn tutynýshylaryna servıstik qyzmetti de usynady. Zaýyttyń jyljymaly-mobıldi 14 kóligi barlyq óńirge baryp, buzylǵan tehnıkalardy jóndep berip júr. Jaqynda zaýyt aýmaǵynda qurastyrylǵan kólikterdi synaqtan ótkizetin laboratorııa ashylmaq.
Aqtóbe oblysy