Atyraý oblysynyń ákimi Serik Shápkenovtiń aıtýynsha, úsh aýdanda asfaltty jol salynbaǵan aýyldar áli de bar. Reseımen shekaralas Qurmanǵazy aýdanynda dál osyndaı 10 aýyl bar. Bul másele bas basylymda «Shekaradaǵy aýyldar shetqaqpaı qalmasa...» degen taqyrypen kóterilgen edi.
Jol tórt jylda jóndeledi
«О́ńirde jol ınfraqurylymy júrgizilmegen eldi mekender Qyzylqoǵa, Isataı jáne Qurmanǵazy aýdanynda bar. Qyzylqoǵa aýdanynyń ortalyǵy – Mııalydan Taısoıǵan aýylyna baratyn joldyń qurylysy aıaqtaldy. Al Isataı aýdanynda Qyzylúı jáne Jasqaırat aýyldaryna jol salý qajet. Qyzylúı aýylyna deıingi joldy salatyn merdiger anyqtaldy. Bıyl jol qurylysy bastalady», deıdi Serik Shápkenov.
Ákim deregine qaraǵanda, Qurmanǵazy aýdanyndaǵy № 7 razezd-Asan-Balqudyq-Súıindik baǵytyna qatynaıtyn joldyń uzyndyǵy – 282 shaqyrym. Joldyń keıbir tusynda sor bar. Keı aýmaǵyn qum kómkergen.
«Qurmanǵazy aýdanynyń Azǵyr óńirindegi aýyldarda 7 myńǵa jýyq adam turady. Bul aýyldarǵa baratyn jol keńes dáýirinde de salynbady. Bıyl sol joldyń 0-36 shaqyrymy aralyǵyn jóndeýdi bastap, kelesi jyly bitirýimiz kerek. Biraq joldyń boıynda sor jáne qumdy jerler bar. Sondyqtan tehnıkalyq sheshimderdi kútip qaldyq», dedi.
Jobaǵa sáıkes, jol qurylysyn tórt kezeńge bólý uıǵarylypty: alǵashqysy – 0-36 shaqyrym aralyǵy, ekinshisi – 36-98, úshinshisi – 98-180, sonan soń 180-282 shaqyrymyn jóndeý kózdelip otyr. Qazir birinshi kezeńge sáıkes, 10 shaqyrym jolda jumys júrip jatyr. Joldyń negizgi tabany qyrylyp-tegistelip, asfalt tóseýge daıyndalypty.
Reseıge tike shyǵatyn jol salynýy múmkin
Bolashaqta kórshiles Batys Qazaqstan oblysynyń Reseımen shekarasyndaǵy ótkizý pýnktine deıin jol salý jaıy oılastyrylyp jatyr.
«Biz Súıindik aýylyna deıin sozylatyn joldan tikeleı shekaradaǵy ótkizý pýnktine jol salý máselesine nazar aýdaryp otyrmyz. Bul josparymyzdy iske asyra alsaq, kórshi elmen baılanysty odan ári jandandyratyn kúretamyr bolar edi. Biraq bul máseleni oń sheshý tek ózimizge ǵana baılanysty emes. Sol sebepti, Azǵyr óńirinen Reseı shekarasyna deıin tikeleı jol salýdy Astrahan oblysynyń basshylarymen kezdesýde kóterdim», dedi S.Shápkenov.
Aýyzsý tapshylyǵy týyndaı ma?
О́ńir basshysynyń pikirinshe, kórshi elmen shekaradaǵy aýyldardyń túıtkili tek jol máselesimen shektelmeıdi. Elektr energııasy da kórshi elden alynady.
«Qazir Qoıandy sý qubyrymen Azǵyr óńirindegi aýyldarǵa aýyzsý beriledi. Bolashaqta sý tapshylyǵy bolýy múmkin degen másele týyndap otyr. Sondyqtan óńirdegi Qoıandy, Taısoıǵan jerasty sý kózderine zertteý júrgizýdi, máselen, qosymsha uńǵymalar qazýdy qarastyra bastadyq. Bul bir jaǵynan shekaradaǵy aýyldarda turǵyndardyń áleýmettik jaǵdaıyna yqpal etedi. Ekinshiden, shekaradaǵy aýyldardan turǵyndardyń kóship ketýine toqtaý salady. Shekaradaǵy aýyldardy bos qaldyrmaý úshin turǵyndarǵa jaǵdaı jasaýymyz qajet», deıdi oblys ákimi.
Qurmanǵazy aýdanyndaǵy Qoıandy ken ornynan jerasty sýy 10-27 metr tereńdikten alynady. Munda uńǵymalardyń debıti – 2,3-5,4 lıtrden 8 lıtrge deıin. Sýdyń mıneraldylyǵy 0,4-1,5-ten 1,7-4,7 g/lıtrge deıin qubylyp turady. Ken ornynda buryn sý beretin 16 uńǵyma bolǵan. Odan táýligine 7,2 myń tekshe metr sý alynǵan eken. Al 2023 jyly Qoıandy toptyq sý qubyry úshin 6 uńǵyma qazylǵan. Bul qubyrmen Balqudyq, Súıindik, Azǵyr, Asan aýyldaryna sý jetkiziledi. Ákimdik málimetinshe, Súıindik, Asan, Úshtaǵan aýyldaryna magıstraldy sý qubyrynyń jelisi júrgizilgen.
Atyraý oblysy