Memleket basshysynyń tapsyrmasy boıynsha 2024 jyldan bastap mektepke deıingi uıymdarda vaýcherlik qarjylandyrý júıesi kezeń-kezeńimen engizilip jatyr. Joba – balabaqshalarda qyzmetterdiń qoljetimdiligi men sapasyn arttyrýǵa jáne ashyqtyqty qamtamasyz etýge baǵyttalǵan, dep habarlaıdy Egemen.kz.
Vaýcherlik qarjylandyrý tetigi 20 qala men 7 aýdanda júzege asyrylyp jatyr.
«Búginde vaýcherlik qarjylandyrý júıesine 4,7 myńǵa jýyq mektepke deıingi uıym qosyldy, 500 myńnan astam bala balabaqshadan oryn aldy. Respýblıkalyq mańyzy bar qalalarda kezek eki ese qysqardy», dep málimdedi Mektepke deıingi bilim berý departamentiniń dırektory Manar Adamova.
Oqý-aǵartý mınıstrliginiń málimetinshe, vaýcherlik qarjylandyrý júıesi bos oryndary bar jáne belgilengen talaptarǵa saı keletin mektepke deıingi uıymdarǵa qoljetimdilikti qamtamasyz etedi. Ata-analarǵa balabaqshany óz qalaýynsha tańdaý múmkindigi berilgen, bul jeke jáne memlekettik balabaqshalar arasynda salaýatty básekelestikti qalyptastyrady.
Júıe eń aldymen «aqsha balaǵa beriledi» qaǵıdatyna negizdelgen qarjylandyrýdyń ashyqtyǵyn qamtamasyz etetin negizgi shartty qamtıdy. Qarajat tek balanyń barýyn ata-analar rastaǵannan keıin ǵana aýdarylady.
«Barlyq mektepke deıingi uıymdardy vaýcherlik qarjylandyrýǵa kóshirý 2025 jyldyń sońyna deıin tolyq aıaqtalady dep josparlanyp otyr», delingen habarlamada.