Qazaqstan men Ázerbaıjan kásipkerleri birlesip, Alakól jaǵasynan taǵy bir sanatorııdiń qurylysyn bastaýǵa nıetti. Osy maqsatta keshe qazaq-ázerbaıjan delegasııasy Abaı oblysyna kelip, óńir basshysy Berik Ýálımen júzdesti, dep habarlaıdy Egemen.kz.
Top quramynda Qazaqstannyń Ázerbaıjandaǵy elshisi Álim Baıel, Qazaq-ázerbaıjan iskerlik keńesi teń tóraǵasynyń orynbasary Aslan Qunııarov, sondaı-aq Ázerbaıjan ınvestısııa holdıngi men Ázerbaıjan ınvestısııa kompanııasynyń ókilderi boldy. Olar oblys ákimine Alakól jaǵalaýynda sanatorlyq-kýrorttyq keshen salý boıynsha ınvestısııalyq jobany tanystyrdy.
«Búgingi tańda Qazaqstan men Ázerbaıjan odaqtastyq qatynastardyń jańa deńgeıine shyqty. Prezıdent Qasym-Jomart Toqaev ótken jyly Ázerbaıjanǵa úsh ret resmı saparmen bardy. Memleket basshysy aldymyzǵa Ázerbaıjanmen ekonomıkalyq baılanystardy nyǵaıtyp, óndiris jáne týrızm salalarynda birlesken jobalardy júzege asyrý jóninde naqty mindet qoıdy. 2024 jyly biz Qazaqstan men Ázerbaıjannyń birlesken ınvestısııalyq qoryn qurdyq. Alakóldegi joba osy qor aıasyndaǵy alǵashqy jobanyń biri. Sonymen qatar Ázerbaıjannan qosymsha ınvestısııa tartamyz» dedi elshi Á.Baıel.
Qazaq pen ázerbaıjan – tarıhy bir, tamyry ortaq týysqan elder ekenin aıtqan oblys ákimi B.Ýálı delegasııa múshelerine týrıstik keshen salýǵa nıet bildirgeni úshin alǵys aıtyp, qazirgi tańda Alakól týrıstik aımaǵynyń bas jospary ázirlenip jatqanyn, sol jerden oryn bólýge daıyn ekenin jetkizdi.
Qazaqstan men Ázerbaıjannyń birlesken ınvestısııalary esebinen jyl boıy jumys isteıtin, bir mezette 800 adamdy qabyldaı alatyn týrıstik nysan salý josparlanyp otyr. Investısııa kólemi – 20 mıllıon AQSh dollary. Keshen iske qosylǵan kezde 200-ge jýyq jańa jumys orny ashylady. Bul joba óńirdiń týrıstik tartymdylyǵyn arttyryp, jergilikti bıýdjetke túsetin salyq kólemin ulǵaıtyp, medısına men demalysty toǵystyrǵan jańa klaster qalyptastyrýǵa múmkindik beredi.
Ári qaraı delegasııa Alakólge baryp, zertteý jumystaryn júrgizdi. Maqanshy aýdanynyń ákimi men Abaı oblysy týrızm basqarmasynyń basshysy qonaqtardy óńirdiń ınfraqurylymdyq damý josparlarymen tanystyrdy. Á.Baıel Alakól jobasynyń Qazaqstan men Ázerbaıjannyń týrızm salasyndaǵy yntymaqtastyǵynda mańyzdy qadam bolatynyn atap ótti.