Memlekettik keńesshi Erlan Qarınniń tóraǵalyǵymen Shetelde kadrlar daıarlaý jónindegi respýblıkalyq komıssııanyń kezekti otyrysy ótti.
Bıyl «Bolashaq» halyqaralyq stıpendııasyna úmitkerler sany arta túsken. Jalpy konkýrs nátıjesine sáıkes, barlyq baǵdarlama men baǵyt boıynsha bir orynǵa tórt adamnan keldi.
Aıta ketý kerek, bul – «Bolashaq» stıpendııasynyń jańa erejelerge saı ótkizilgen ekinshi baıqaýy. Úmitkerler testileý, áńgimelesý jáne Respýblıkalyq komıssııa otyrysynda baǵalaý sekildi úsh kezeńnen turatyn irikteýden ótti.
Osy joly 981 úmitker stıpendııaǵa ótinim bergen. Olardyń ishinen birinshi kezeńnen – 916-sy, ekinshi kezeńnen – 659-y, úshinshi kezeńnen 217-si ótti.
Jıyn barysynda 217 azamatqa «Bolashaq» halyqaralyq stıpendııasyn taǵaıyndaý týraly sheshim qabyldandy. Onyń ishinde 167-si – magıstratýrada, 13-i doktorantýrada oqıdy. Sondaı-aq 37 azamat álemniń eń úzdik ýnıversıtetteri men ortalyqtarynda kásibı taǵylymdamadan ótedi.
Komıssııa músheleri basymdyq berilip otyrǵan mamandyqtarǵa erekshe nazar aýdardy. Iаǵnı stıpendııa ıegerleriniń 67,7 paıyzy – jaratylystaný-tehnıkalyq, al 32,3 paıyzy áleýmettik-gýmanıtarlyq baǵyttar boıynsha bilimin jetildiredi.
Sondaı-aq Respýblıkalyq komıssııa ǵylymı taǵylymdamadan ótýge qatysty konkýrstyq irikteý nátıjelerin qarastyrdy. Oǵan 165 adam ótinish bildirgen. Úsh kezeńnen turatyn konkýrstyq irikteý nátıjesinde 68 azamatqa álemdegi jetekshi ǵylymı jáne zertteý ortalyqtarynda taǵylymdamadan ótýge stıpendııa taǵaıyndaldy.
Otyrys qorytyndysy boıynsha Memlekettik keńesshi Erlan Qarın «Bolashaq» halyqaralyq stıpendııasyn odan ári júzege asyrý jáne jetildirý jóninde naqty tapsyrma berdi.