8 tamyzda saǵat 04:30-da Qyzylsaı-Shymkent aralyǵynyń kúzetiletin temirjol ótkelinde HOWO avtokóligi manevrlik teplovozben soqtyǵysqan, oqıǵa – poıyzdardyń júrý kestesine áser etken, dep habarlaıdy Egemen.kz.
Aldyn ala málimetter boıynsha, júk kóliginiń júrgizýshisi jaqyndap kele jatqan jyljymaly quram aldynda ótkelge shyǵyp, jol erejesin buzǵan.
Eshkim qaza tappaǵan. Júrgizýshi aýrýhanaǵa jetkizilgen.
Jol-kólik oqıǵasy qozǵalys kestesine áser etip, úsh jolaýshylar poıyzynyń qozǵalysy ýaqytsha toqtatylǵan. 07:18-de ýchaskedegi qozǵalys tolyqtaı qalpyna keltirilgen.
«QTJ» UK» AQ júrgizýshilerdi jol qozǵalysy erejelerin qatań saqtaýǵa jáne temirjol ótkelderin kesip ótý kezinde asa saq bolýǵa shaqyrady. Erejelerdi buzý tek materıaldyq zııan keltirip qana qoımaı, ómir men densaýlyqqa qaýip tóndirýi múmkin.